17. E pe takocininaniwok

Aci ki ickwa pe takociniwok ka ocki pimatisitcik ka ki nta pamatisitcik. Nikotwaso ki taciwok ka ocki pimatisitcik neta ka ki apitcik e weritatcik ite ke ici pa aicaniwok acitc ke aitotcitek. Wicamakaniwok tca kitci nta aiatisoketcik ka ki aiciwepasitcik ka pamatisitcik. Minawatc wir Harold kiapatc mekwatc aiatisokatitiso opimatisiwinik.

Kitotakanik e nta aiarimwaniwok

Ka mitatc kitotakaniw : - Anotc ke pe petakok, nikotwaso ka ocki pimatisitcik kata pe nta aiatisokewok tan ka ki icinakonik ka ki nta pamiparitcik nete France ka ki icatcik. Aniki ka ici weritatcik aniheriw awaciwikiwamik ka ici otamirotcik.
Tan apitc ka pe takocipariekw?
Rodrigue - Aci wiec peiko pisimwa.
Anim - Tan tca ka ki iciwepak?

Marilou -	Ki micta miroparin! Micta mitcetc kekocic ni ki wapaten patok irikik esko pimatisian ka ki ici wapataman kekocic.
Claudie -	Ni ki micta miro weritan meka. Ni ki micta miro nikan nanto kiskeritetan tan ke icinakok ite ke icaiak. Kotc ka ki ici kackitaiak kitci weriak ni ki totetan.
Anim -	Ki ia tca takon kekocic ka ki iciwepasiekw aka ka ki otci ici weriekopan?
Waban -	Ehe, Aric kirawe nte tan ka ki isparitcik aniki ka ki pe witcewikoiak. Nictam tapwe ni ki onockweritenan tekaci meka pitoc ota e ici pimatisinaniwok. Micta nakasipanak kitci pe kiwetcik orina kaie koctamopanak kitci aimihatcik neta ka tacikeritci.
Anim -	Ekwa ani mocak ka ki isparitcik?
Waban -	Nama, Ka ickwa nico manactakaneak aci nta erowek ki iti mirerimonaniwon.
Anim -	Ki nisitotenawaw ia wetci ki isparitcik aniheriw?
Waban -	Nit iteriten nin nictan nte, ki wi kokwasikeritcikewok osam potc kirika tekaci aka e kiskeritciketcik ekoni e isparinaniwonokwe wiec mitcerika e icaian aka e kiskeritaman.
Anim -	Tante kit iteriten wetciparik anihe ka wi ekwamictakeiekw?
Claudie -	Nin, Nit iteriten aka e ki otci wiskatc icinakok anihe nipimatisiwininak…
Waban -	Kekotc aci e ki ickwa wapatamak…
Claudie -	Euh…kirika tca. Tawok ni neta ka ocki pimatisitcik aka wiskatc eki otci icinakonik opimatisiwiniwaw. Aka wiskatc e ki orowitcik otenamiwak ekotca e micta kockowapamotcik mitcerika e wapatakik tan e ici pimatisinaniwonik pitoc wiec. Micta meka mitceno kekocic pitoc tca e icinakok. Enko anihe nit iteriten nin kirika ka ki posiparik.
Marilou -	Arimatc meka kekocic e mirwacik aitotcikatew ocki aka mocak peikonok kitci aitotcikatek ekote wetci kiskeritcikatek tan e aicinakok pitoc wiec. Nama tepirak kekocic kitci patahikatek aka mia ka icinakok. Mocak tepirak awik aka ka mirwacinik e ici wapatak ekoni wetci mocak koctatcitc. Kokwasikeritcikew tca mocak.
Rodrigue -	Arimaniw aric awik tepirak ka miwacinik kitci aitotak. Arimatc meka otcitakotc nikickatew kekocic ka arimak ki otci kiskeritaman tan e icinakok pimatisiwin. Tawok meka ko kirika ka ocimoctakik kekociciriw. Tepirak ka wetanik ka nantowapatakik.
Anim -	Ka wetanik kekocicriw…kekwan anihe ka wi iteiin?
Rodrigue -	Matci mackikiriw mitowi.
Marilou -	Tapwe ni anihe ka itein. Kitci kackitatc awik aniheriw kitci ici pimotetc patoc kirika ka ici waskackakotc cowatc e icinakonik. Kitci takonik pimatisiwiniw.
Anim -	Ki pimatisiweritakonik?
Marilou -	Ehe, kitci takonik miro pimatisiwiniw e ici waskackakotc otacikewinik. Ka ici wapataman meka enko anihe kaskina ka ici pimoteiin ki pimatisiwinik. Aka orina kitci kokwasikeritakok ka ici pimatisiin. Kecpin meka mocak e koctatikok kipimatisiwinik atcikotc mocak ki wi ekwamictakan.
Anim -	Ma tca kit iteriten arimatc awik nta pamatisiw pitoc wiec kitci kiskeritak tan e icinikonik pitoc wiec. Ekota ke otci miro kiskeritak?
Waban -	Ehe, Ekoni wetci wi nta pamipariakipan.
Anim -	Kekwan kirawe ka ki takickakoiekw ka nta pamipariekw?
Claudie -	Nin, Paris ni ki micta sakitan. Meskanawa acitc micta mikiwama ka micta kiceatisimakoki, kaskina micta mirwacinopana. Mitowi anihe Musée du Louvre ka icinikatek, Atawekamokoca e micta mitceki. E micta tca kirika pimatisiweritakoki. Nanikotin mia sa ko e pa micta kiwockwepariapan e apitc micta kockowapamoan. E apitc ki micta mireritaman kotak kekocic e ki wapataman mia sa e micta miriritakik e pimatisitcik e ki wapamakik tan e ici arimwetcik acitc tan e totakik e pimotetcik. Kaskina anihe ni ki takickakon. Ni ki mirockakon ni ka ki itwan. Tekaci ota kirano anihe aka e ici wapataman.
Valentine -	Nin tca , Kaskina kekocic ni ki sakitan, Paris, ickotetapana, ka ki ici kapacimoan, Château de Versailles, aniki ka ki petok ka ki ici pa aicaiikw. Anihe tca kirika tapickotc e ki micta pa miro witcewitowok. Aniki kaie kotakahik ka ki pa wapamokok ka ocki pimatisitcik pitoc wiec kaie wirawaw e pe ototetcik. Peikw nta vietnam pe ototew ickwecic ka ki pe miritc peikw aitinekwewiniw.
Rodrigue -	Nin tca, anihe kirawe ka ki kockwapamoan anihe ni tan ni pitoc e aicinakok e ici notcimiwok. Mia sa micta mitcet otenawa e ki pa wapataman. E micta tca kaie mirowinakositcik otacikewiniwaw, Micta mikiwama e micta kiceatisimakoki kiapatc e micta nahinakonik e apitc ki miro kanaweritakik, kaskina anihe…
Waban -	Kaie nin, kaskina anihe ka ki wawitaman ni ki micta takickakon. Aniki kirika ka taciketcik neta mictahi ni ki mirerimawok : ki meka micta kicterimikonowok, ki micta ko pe aimihikotanowok e nokotatcik okicteritcikewiniwaw. Nama kaie orina arimanopan kitci aimihakok.
Éric -	Nin tca, kekocic ni ki nanakatcitan.
Anim -	Kekwan ka ki nanakatcitaiin?
Éric -	Aniki pakwa emitcikocicak aspinikotc takonamok minicaporiw. Kotc matci e kiwotamowakaniwitcik ke ma kotc e mitcisotcik. Ekweriw mocak ka wapamatcik e takonakik. Aric wirawaw tepirak peikorakan kekotc nicorakan ekoni e ponitatcik.
Anim -	Ekote peikon ota e totcikatek taina?
Éric -	Ehe, nama aric nte nin nit ici wapaten ka ici waskackakoian, e ici wapamakik nin nama ni kackitawok ni kitci totakik kecpin e minikwetcik ekoni aspin. Tekaci tca nac e osamihitisotcik, Nete tca ni ki wapamawok minikwewok tepirak kitci mireritakik, tapwe wirata tatikenak aniheriw ka totakik minikwewok tepirak kitci mireritakik.
Anim -	Tan e ici wapataman kir nikanik ke totaman?
Claudie -	Nin, ni ta mireriten kitci kiskinohamakeian akitasowinik itekera aniki nte kirawe ka ocki pimatisitcik minawatc tca kitci iti tiperitaman kiskinohamatokamikok.
Anim -	Micta mirwacin ka wi ititoskein! Ki ka mirwapatcitan e micta kackitain kekocic e weritain.
Marilou -	Nin tca, nte ni wi ici otamiron ka witcihatcik ko ka ocki pimatisiritci kitci miro witcihakik ka ocki pimatisitcik kitci weritatcik kaie wirawaw kekociciriw e saperitakonik. Ka pe takocinian micta mitcet kekocic ni ki mamitoneriten.
Anim -	Matci ia ketcinatc ki ta weritan kiapatc kitci nta pamirariekw ka ocki pimatisitci otci.
Marilou -	Eheee, ni ta micta mireriten.
Rodrigue -	Nin tca, ni ta mireriten nte ici otamiroan aniki ko ka icpapitcik ka micta nahikiskeritakik notcimik e arimotcikatek. Esko ki pe takocinian micta pitoc ni ici wapaten kekocic mia sa mitcerika e wapataman tan e icinakok nitacikewin.
Anim -	Kecpin tca pitoc ici kanawapataman ka ici waskackakoin ki ka ki itwan ki micta kice mirwacin e ki nta pamiparian nipara kekocic ni ki natcipatan.
Valentine -	Nin tca, nte ni ka ici kiskinohamason matci ko nte e tcipakwaniwok ka micta mironekwaniwok.
Éric -	Esko tca potc ki rikwatcokecitc nete ka ici tcipakwaniwok kiskinohamatokamikok.
Tous -	Ah! Ah! Ah!
Anim -	Ehe, rikwatcocak ni mikawin sa ni!.. Ka ki pa ataweiekw kitci mawotci coriakekw. Wirata ni ki otapinataikw ka tca wi kotcipowikik aci kaskina ninitcanicak ickwa mowepanak ekoni aka e ki otci tatc nin kitci mowak, arimatc tca ki ka nta wectamowinawaw kaie nin kitci kotcipowikik.
Éric -	Nin, nikotin e kicikak, nta mireriten kitci takok ke ici taci apahikeian.
Anim -	Pa natawapamicikanan ki tca witcihitinan e tipatcimoin.
Waban -	Nin, Ni ta mireriten ni nte itekera ici otamiroan masinactetcitcikan ko e wectakaniwok. Mitowi ko nte ka tipatcimomakaki. Tan e ici pimatisinaniwok kitci kiskeritakositcik atita iriniwok tan kaie wirawaw e pa itatcihotcik. Kaskina ko nte ka wi nanto kiskeritcikatek.
Anim -	Matci tca potc ki ka wapatenano kekocic e ki ocitain ke nipik kitci masinacteperitakaniwok.
Wapan -	Matci potc.
Anim -	Nikwimesak, Micta mitceno ka wi itotiskeiekw nanake. Kaketin ki pakoserimitinawaw kitci kackitaiekw kitci itotiskeiekw ka ici nataweritamasoiekw. E ki kackitaiekw kitci nta pamipariekw e ki micta miro werihitisoiekw ki nokotanawaw e kackitaiekw takaci kitci takociniekw ite wa icaiekw aka e ataweritcikeiekw. Micta tca mikwetc kit ititinawaw e ki natawapamiekw kitci nta pe aitisokoiekw.
Tous -	Mikwetc e ki pe wicamiak.

E kanawapamatcik kaskina e itatisitcik. Kit iteriten ia mirwaciniw ka wi ici otamirotatcik ?

Ehe.
Mia icinakoniw ka itatisitcik kata kackitawok tepirak e kanawapamakaniwitcik e itatisitcik. E ki aci kackitatcik kitci nokotatcik kekociciriw e wi totakik.

Nama ketcinatc.
E ki nokotatcik ka wi totamowaspan. E wi nta pamiparitcik micta mirerimowok mekwata awocamec kaie tca tapwerimitisowok.

Anim -

Anihe tca ke iti tipatcimoan aci , ka wi petakeikw tan e iciwepak kotenaminak.
♦ Kata takon ke ici octakaniwok ka manikewakaniwok nanake ki ka iti wapatenano. Kitci iti tcimotakaniwok. Mekwata ni aniki ka nikanapitcik ki pe tipatcimowok. Wiec tca nicto mitana kata taciwok ke otamirotcik. Ekoni irikik ke tacitcik ke otamirohakaniwitcik.
♦ Minawatc ota awaciwikiwamik ke ici pimatisinaniwok. Aci ki ickwa tipatcimowok tan ke iti aititosketcik ke nipinik. Kata micta mitceniw ke iti aitotisketcik. Peikw tca kekocic kata meckotciparin minawatc iti takwakike. Nicowaso kicko kata cenikatew ohwe awaciwikiwam.Tato kicko ni ka ki itwan.
♦ Minawatc tca, Anotc takonike iriniwok ki makonewok peikw iriniwa wiec nicitina e tato piponesiritci ka kitikeritci ka sakaswakaniwonik. Kata tca arimitakosiw aniheriw otci. Ke tca ici itactahorakaniwitc kirika e atamakopanen ka ocki pimatisiritci matci mackikiriw. E takonikopanen mikiwamiriw taci e otapinakik matci mackikiriw acitc ekota tawakopanen ka taci atamitisotcik. Kecpin tca ickwa tipaskonakaniwite matci micta mitceto pipona kata kipohwakaniwiw.
Enko anihe patama ke ki ici tipatcimoiak. Ekoci minawatc natotamok niarano tipahikaneake awacamec ni ka tipatcimonan.

E kicowasitc Harold

Anim -	Mamitcic ka aimihitoikw, Anihe ka taci atisokatai napanecic ka otapinekw kirika kikwimes.
Harold -	Ehe. Ekota ni ki taci onipatikoian tekaci nipimatisiwinik. Anaha ka ki kiskinohamowitc eko anaha peikw aniheriw ka irapatisitc. Teka atito ekoni ka ki aitotowatc okwimesa.
Anim -	Kekwan tca neta ka ki iciwirikoin neta. Kekwan ka isparik wetci tekaci ki kweskiparik kipimatisiwin.
Harold -	Nama ni ki otci tapi miro kiskeriten tante e ici posipariapan aka e ki otci tapi miro mamitoneritaman. Ni apitc mekwata ka kitciparian ni ki micta mireriten. Ni micta meka tca mirerimotai e apitc mirerimowapan nama takonopan kekocic ka arimeritamapan tekaci ni onikatai ka arimeritamapan. Ka iti ickwapaik aric anihe ka iteritamapan aci nta ni ki iti osamihokon. Ni ki iteritai tepirak memantcic ni otapinen matci mackikiki.Tepirak e wi kokwetcihitisowapan.
Anim -	E wi kokwetcihitisowipan kekwan ka wi itein?
Harold -	Ehe, E kiwepariapan ko e mari kicikak. Ni totetai ko kitci otapinam epawamoci matcaian. E takociparipan tca ko orina ko mia e micta mireritamapan aka e kiskeritaman e taci macikakoian. Notc kaie ni wi matci iriniwikasotai. Anaha tca niwirimocec Lucie icinikaso orina ki micta arimeritam e wapamitc ni e totamok.
Lucie -	Kekwan tca aka wiskatc e otci ocoriamin? E tca otamiroin. Minawatc kotawi aspinikotc tepirak kiwockwepiw kir tca mia e pe kiwockwatisiin. Ekote ia ni ke icinakok aspikotc kipimatisiwinino. Ma ni wirawatc ki kiskeritetai e tatc kinitcanic? Arimatc ia ni ka masinahen kitci mikictek opimetak kitci ki mikawin?
Harold -	Aci nta ni micta pe natcipahikotai.E kicowahikoian. Kir tca arimatc ia ni ni ka masinahen kiskatikok e micta kice kicowahin e micta sikatcitatan ni e pe ici aimihin? Peikwa ka ickwa otamohok mekwatc tca e taci takokonatc ka apiciciritci. Minawatc tca ka ki totak tatwaw e kiwepariapan kanaweritahiwepan ni ka apiciciritci otasik. Nin ekoni mocak e totamapan kitci aspitacikeian napanecic, mitowi potc e ititisoiapan : nama ni wiec anihe katotaman matci ni ka toten wa totaman.
Anim -	Ni tca apitc, Nama ki otci iteritetai kotenamik ki taci otamiroin?
Harold -	Wirata peikwa Lucie ni ki pe itikotai : Kata takon ota otamirowin kata tawok ke matcatatcik kekociciriw kitci otci otamironaniwok. Ki ta ni ketcinatc otamirohikoin. Kepin tca otamirohikowine matci ki ta pe kiwan aci.
Harold -	Ni ka kotci nta kanawapaten. Ni ki tca ican.
Lucie -	Tan tca ka itikoin?»
Harold -	Ka ici natawerimatcik iriniwa ka okaromiritci.Wirata ni ki witamowawok kaskina kekocic e kackitaian e totaman. Aka wiec kitci iteritaman kotc ke ici mirikoian otamirowin. Arimatc aric otcitakotc kitci okaromian ni ki itikok. Kecpin ki kiweian, ki miroparik, pitoc kirawe ni ta ki iteritakosin. Kirawe ni ta aitacikowataik ninitcanicak. Peikwa e tcipaiatiko kicikak, Ni ki kiwatai kirika napenecic e ki matceworak. Ni ki itaw Lucie : ma ki wi kotcihaw.

Lucie -	Kekwan tca ni anihe? Napanecic! Aie! Tekaci aka pe asperimo kitci otapinaman anihe towi matci mackiki.
Harold -	Nama ni miretetai aka e otapinak kekociciriw, Mia ko e iteritamapan koctatikosiw nin otci aka wir kekociciriw e totak. Nac tca e ki micta cikimak nac kaie wie ki iti otapinam. Nama aric ni ki otci iteritetai tecikotc kitci micta osamikak. Nac tca arimatc otosa ki kanawerimeriw onitcanica nesitc. Cikawiripana ni aci kaie kaskina kiceatisiripana onitcanica. Ki tca iti matceatikew e ki taritci ke wirimocecitc nama tca tapwe ni ki otci wapamanan ninitcanicinan. Nama kaie tapwe ni ki otci arimomanan. Aric memantcic ko e iti icinakosispan aci nta micta arimomepan.
Lucie -	Kir ni ka totaman wetci ki onihak ninitcanic. Nama wiskat ki otci kackitanano werita kitci kanawerimaiikw. Aka tca wiskatc kekocic e otapinamapan kir ka ki iciwiriin neta. Ekotca anotc e micta arimihikoian. Arimatc aspikotc kitci otapinak.
	Kanokan : Ekoni matci e totcikatekipan weckatc matci pakitinepanak onitcaniciwaw. Onikihikowa e mirawaspan kitci nitawikiharitci (kotc e ickwa nitawikiritci ke ma kotc aci e iti macikitiritci) ota tca nihe e arimotcikatek otosik e nta taciketc e matcewirakaniwitc namieriw ka nataweritakipan Lucie. Atcikotc tca nama aci ki wapamew onitcanica.
Harold -	Nin tca, aka tca ki petaman anihe ni micta matci iriniwitai. Ni micta papikotasotai ni tatikickatetai opipetak e papokanetakahaman kaskina kekocic ni pikotatai. Ki tca minawatc iti kanawerimawaso enko tca anaha nikosis. Memacic tca ni ki ponitanan wiec nicopipona. Ni otamirocitai ko nanikotin. Erowek ni micta mirowesitai kekocic e aititoskeian e ki micta miro kiskinohamowitc anaha ka witci otamiromakipan. Ekote mocak ka ki totaman ni ki kotcitan kirika kotakahi kekocica tan e totcikateki. Kiapatc minawatc ki iti kanawerimawaso enko tca anaha Marilou ka ki iti nitawikitc. Orina tca ni ki arimeriten nta.
Anim -	Irikik tca nta ki ia ni ponitan e otapinaman kekocic?
Harold -	Nanikotin, ni minikwatai nama tca ni otapinetai matci mackiki. Neta meka notenaminak e apitc aka takokipan otamirowin nicomewitan meka tca ko memacic. Mictahi arimanopan. Ka tca nirtawikitc ka apicicitc, mictahi kirawe kiapatc ni ki micta kicowasin ni e iciwepasian. Tepirak meka arimisiwin takonopan notenaminak.Ni comewitan, ni kitimakisitan. Kirawe tca ni ki iti minikweiatisin. Micta arimeritamopan niwirimocec.
Lucie -	« Ni e icinakosiin kirawe ni mireriten aka kitci tacikein ota. Ni miroparihitonan kirika kikawi. Esko ki nipotc kotawi nama takon kekocic ka arimihikoiak. »
Harold -	Ni tca apitc, notcimik ko kirawe ni miretetai e pa tacikeian. Wiec ko e ickwa nicw, nicto kekotc e ickwa newo kicikak ni pe kiwatai.
Anim -	Tan tca ko e iterimoiapan notcimik?
Harold -	Nama takonopan kekocic e mamitoneritaman : Ni micta meka otamikatai e pa atockeian, ke aitotiskeian ka ici kapecian. Ni pa mokitcikatai arica kekocic e pa orokotaman. Ni micta witcihikotai. Ni ki pa otamiron kaskina wiec. Nama tca tapwe ni ki otci wapamawok tapwe ninitcanicak e matcekitcik. Ni ta ki micta mireriten nanikotin ki aimihikik nama ni kiskeritetai ke itikik kirika nama ni kackitatai pekatc kitci arimweian. Ni koctikotaikw meka kirika. Tapwe sa kotc wirata. Aci kaie tapi tato piponesipanak kitci pitaketcik kiskinohamatokamikok. Nin tca, micta mitcenopan ka ici mikawian matci kekocic acitc tca kirawe kiapatc e ki iti iteritaman aci kirawe ni iti onihawok ninitcanicak.
Anim -	Tan apitc ka iti otapinakik kaie wirawaw kinitcanicak matci mackikiriw?
Harold -	Hahhh ! Ekota nta kirawe ka micta arimak. Nictam e totamapan ni kasotai e otapinaman matci mackiki orowitamik ko nte ni taci otapinetai. Wirata ko ni minikwatai nama aric matci mackiki ni otapinetai. Nac peikwa ni ki ocikohotai e otamiroan arimatc tca nimikiwamik ni tacikatai nama wirawatc notcimik ni ki icatai. Mitcotorkanan tca ni ki tacikan arimatc nimikiwamik.Ekota tca nta kirawe ka otapinaman matci mackiki peikon kaie wir niwirimocec ekoni katotak. Kirawe ko kiapatc ni otapinetan aka e takok e kiskinohamakaniwok. Ekota nta ka kitciparitc nikosis e minikwetc. Nama tca kinec minawtc ki iti sakaswakew nac e iti aspitatciketc napaneca. Nanake patoc wir Marilou ka iti pakicinitc neta. Ekoni tca kaie wir ke iti icinakositc anaha mamitcic ninitcanic.Kata nosanehwew aniheiw kotakeriw.
Anim -	Ka wapataman anihe tan ka ki totaman?
Harold -	Nama kekocic. Ni kiskeritetai misawatc ka itikik aka kitci otapinakik matci mackikiriw peikon kata ki otapinamopanak. Nama tca kaie ni wi petetai kitci itikoian« kir tca ki otapinen, kekwan tca aka nin wetci otapinaman», nama meka ni ta ki otci kiskeriten tan ke ici naskamoian.
Anim -	Ka tca iti mirwatisiin e ki ocikohoin tan tca ka ki totaman?
Harold -	Kiapatc ni ki otamiron, kirawe aric ni ki arimihikon. Ni micta kicowahitisotai, kirawe ni kicowahitisotai kirawe kiapatc ni osamiketai. Anihe kotc matci mackiki ka miroparikipan kitci totaman ekoni e ici otapinamapan. Acitc tca ekoni e ici pa witcewokipan arotcikotc iskwew.
Anim -	Kiskeritamopan ia ni kitiskwem?
Harold -	Ki kiskeritam ka micapinetc. Ekota tca nta, ki takon kekocica ka ki iti meckotciparik.
Anim -	Kekwan mitowi?

Harold - - Peikwa e pe kiweian, Taripana napaneca. Awin ka ki mirisk?

Lucie - - Ni ki natowi toten.

Harold -	Tecikotc ni ki nisitoten kekwariw ka wi itespan. Aci nta ni wapatetai e micta kice maratak ite ka ki iciwiritisoian. Kirawe kiapatc ni kicowasin acitc kirawe kiapatc ni ki otapinetai matci mackiki. Wirata peikwa ni ki mamitoneritetai kitci icaian nte ka ici witcihakaniwitc awik e wi ponitatc matci mackikiriw. Nama aric ni wapamitisotai neta. Ota meka ka pe takocinian mia awik ka kiwockwatisitc ekoni e iteritakosiapan.
Anim -	Ekoni tapwe wirata e isparik matci mackiki kaskina wiec ici matci totakemakan. Kirawe tca kiapatc awik e osamikak. Kecpin tca aka tepirak anihe e kanawapataman matci matci mackiki kekwan tca kotak kekocic ka kicowahikoin?
Harold -	Kecpin wapatamane. Ekoni ka icinakositc kaie notawi ekoni kaie ni wetci icinakosian enkweriw tca kaie nin ka ki mirikik ninitcanicak : nikosis mekwata e icinakositc mia nin ka icinakosian. Kirika tca nama kackitaw kekociciriw e ititosketc minawatc wir nitanis mia okawik e itatisitc. Anaha tca ka apicicitc enkweriw kaie wir ke nasanetatc ka ki ici pimoteiak. Enko ni tepirak ak taci aianiskowi miritoiak arimisiwin. Misawatc e micta wi nanto kackihoiak. Minawatc ko pe moskiparin…Kekwan wetci icinakosiak anihe. Kekwan wetci micta mitcetitcik aniheriw ka icinakositcik ka micta arimiparitcik? Nama takon kekocic, nama kekocic ni kackitanan kitci totamak. Ma kit iteriten takoniw tapwe kekociciriw wetci kicowatisitcik. Nama ni kaie tepirak aka e tokok coria. Atamik ni kirika otciparin ka arimihikoiak. Nama ni mirerimonan . Misawatc mekwata e miroparik kekocic e totamak. Nama peikon ni mirerimonan.

Kekwariw ka wi itetc Harold « micta ariman atamik » ?
Enko…	Enko…	Enko…	Enko…
e micta rikitaian kaskina kekocic aka ka mireritamihikoin kekotc aka mia ka ki otci totakoin aka wiskatc e ki otci kackitain kitci witaman.	e cikeritaman e wapamatcik kaskina kiwitcicanak e micta arimihikotcik mitowiriw kaie kir ka arimihikoin.	e kiskeritaman tekaci aka wiec kitci ki totaman kitci meckotcitain anihe ka taci airimihikoin misawatc e micta wi natowi totaman kitci miroparik ka wi kiskeritaman acitc ka ici micta pasoweritaman.	e kiskeritaman aka misawatc e mirerimotc e witacikematc owitcicana.

Kekocic pe otitikonaniwon.

Ka masinahiketc -	M. Mercier, Ki pe takon kekocic kir otci.
M. Mercier -	Ah! Tapwe ia?

Secrétaire -	Ickwecic ni ka ki petatc aniheriw pweteriw.
M. Mercier -	Niah ! Ickwecic ia ka ki petatc pweteriw e wikwapikatcikaterik. Nin otci! Matca wirata kekocic wi ocki kitciparin?

Secr. -	Ah!Ah!Ah! Patama ki cenenawaw pwete ka pe iciticahamakoin epwamoci aritcikotc kekocic aiteritaman. Matci kwecan nama mirwacinotake!
	M. Mercier cenan pweteriw : Haaa! Niah wesa wir ni!
Secr. :	Kekwan ni? Rikwatowok!
	M. Mercier otapinew peikw rikwatowa.
M. Mercier -	M. Mercier - Ki ni ke pe masinahikaniwon! Kwei M.Mercier Ekoci tca kotcipowi anotc nama minawatc ki ka ki kotcipowaw. Miro kotcitama, Valentine.
Secr. :	Nama taw kotak? Awira nama kinec kata kimoc kekocic aiteritcikatew
M. Mercier -	Bof ! Mmmm! Micta mirwatikwatc ekote ni marotc. Ni ta ki micta wirinockakotai misawatc Mmmmm ! Micta ni wakatciciw ma ki wi mowaw peikw. (Mium mium mium)