3. Ke ici nosanetatcik e otamirotcik

Arimikewok kitci oreritakik tan niheriw tca mia ke nakanictatcik ke itotisketcik. Ki tca wicamewok ka mitatitci awaciwikiwamiriw kitic witcihikotcik.

	Ka mitatc - Ki pe wicaminawaw kitci witcihitakok e mawotcihitoekw, tan tca ke ki ici witcihitakok?
Waban -	Ni ta mireritenan kitci witcihiak e weritaikw ka wi pamatisiak.
Ka m. -	Kekwa tca mekwata aci ka ki otamirotaiekw?
Waban -	Ni ki aiarimotenan tante ke icaikw acitc kekwan ke aitotiskeiak acitc irikik coria ke apatak.
Rodrigue -	Nama moci mia ni ki otci oreritenan ite ke icaiikw. Wirata ni ki itanan patama ketcinatc kitci kiskeritamak ite tca mia ke icaiak.
Waban -	Ekoni mani peikon.
Rodrigue -	Nama ni peikon isparin.
Coord -	Ta tca ke isparik?
Claudie -	Aci ki taci kikatocinano. Pa peikw awik wi oreritam.
Marilou -	Kaskina meka micta kictapatan kitci kanawapatamokw. Tepirak kotc nama ki kiskeritenano ke ici kitcipariikw.
Coord -	Takon ia tca mia ke witamekw ke ici kitcipariekw ke ici otamiroekw?
Claudie -	Ehe, patam misiwe ni ka kanawapatenan kitci kiskeritamak mia ke ici weriak ke ici otamiroak.
Waban -	Aric ki kiskeritenano ia tca ke ici otamiroiikw?
Claudie -	Nama moci tekaci wewerita osam kaskina aroc kekocici ki aiarimotenano.
Marilou -	Nama aric kir tepirak ke witaman e iteritaman.
Claudie -	Nama aric awik ki otcihikw kitci arimwein.

Marilou -	Nama, aric kecpin awik aspinikotc peikonok e arimotak kekwariw mia ko e itetc « nin kirawe mirwacin ka iteian enko anihwe ke otapinamokw».
Claudie -	Ah! Aric nta! Kecpin aspinikotc awik wi tapwete aka wec kitci iterimahiwetc, kekwan tca wetci aiarimwaniwok? Arimatc a tca ni ka otapinen ka itein kitci aka kicowasiin? ?
Waban -	Ekoni ici wita kecpin aka e otapinikatek ka itein tecikotc nama ki mireriten..
Rodrigue -	Tapwe ni ekoni e itatisitc , arimatc ko tecikotc kirctam kitcin arimweiin. Mia sa ko kir e tiperitaman..
Waban -	Arimatc aric ko awik kitci kitciparitc kitci arimwaniwok. Nama tepirak ki ka taci kanawapamitin kitci pehitan e apitc ma kirctam e wi arimwein.

Ka m. -	Tok Tok Tok (moci otatamatcitcehikew) Pekatcikw aci! !

Ke ici nosanetatcik e otamirotcik

Ka m. -

Mekwata anihe ka taci totamekw, ka wi matcepariekw ekota matci ke ickwaparik anotc mekwata. Kecpin nataweratamekwe kitci miroparik arimatc kaketin ki ka witamatonawaw ke totamekw kitci miropariekw ke ici otamiroiekw aka kitci matcipariekw. Ki ici naheritenawaw ia ohwe ke totamekw.

Ke ici orakonakik ke ici otamirotcik …

Ceckwatc

Kictapaniw nama aric soka

Kictapataniw

Ka otamirotatcik -	(Nama kitowok.)
Ka m. -	Tan tca kiwi pamatisinawaw a ni?
Ka otamirotatcik-	(Nanamiskweriwok.)
Ka m. -	Kaskina ia tca kiapatc wi witcihiwew e otamirotakaniwonik?
Waban-	Ehe.
Claudie -	Ehe.
Marilou -	Ehe.
Ka m. -	Kir tca, Rodrigue ?
Rodrigue -	Nama aci ni kiskeriten e apitc kiapatc saperitaman.
Claudie -	Ah! Kecpin tca kaskina awik iti kapate aka tca moci e kitcipariikw.
Ka m. -	Claudie, nama ni awik cikimakaniwiw. Matci ni ka ta kiweritam awik. Kecpin wi kapate ekoci kata witam tecikotc aka kitci kasotc.
Rodrigue -	Ni saperiten ni nin, Nama aric mitowi anihwe ka taci aisparik mekwata.Nama ni ki otci pe ican kitci kikawotaman.

Aiackotc e arimwaniwok

Ka m. -	Kekwan tca nirctam ke ki oreritcikatek ke ici nosanetakaniwok.
Tapickotc kaskina -	Kaskina tapickotc e tacitcik- Anihwe nirctam ke… Nin e ici wapataman… Anihwe ke ki totamokw… /
Ka m. -	Holà ! Hahw ! aka paatama! Ma ni kit iteritanawaw patama aickotc kata arimwaniwon?
Ka otamirotatcik-	Ehe.
Ka m. -	Wiec a tca ki ka masinahenano?
Claudie -	Neta ka ici masinahikaniwok. Nin, ni ka masinahen.
Marilou -	Kecpin nicw awik e arimwetcik tapickotc awin tca ke oreritak?
Ka m. -	Micta mirwaci ohwe kokwetcikemowin!
Rodrigue -	Patam ke kata taw ke nikaniwitc e arimwaniwok kitci nanahipatak e arimwaniwonik.
Ka m. -	Tan tca e iteritamekw?
Ka otamirotatcik-	Ehe.
	Claudie masinaham ke ici nosanetakaniwonik : «Anaha ke nanahipatak e arimwaniwonik enko ke iti oreritak awin ke iti arimwetc aka kaskina tapickotc kitci aiarimwaniwok». »
Ka m. -	Aspinikotc a tca peikonok enko ke apitc kitci nanahipatak?
Waban -	Matci potc aiackotc.
Claudie+Waban+Rodrigue -	Ehe, ekote aiackotc.
Marilou -	Kecpin tca wir wi arimwete?
Claudie -	Nama tepirak wir e iriniwitc matci kaie e ickweciwitc?
Marilou -	E iriniwitc kekotc e ickweciwitc.
Ka m. -	Anihwe ko towi e ici otamironaniwok anaha tca ko ka nanahipatak, e ickwa arimwaniwonik ko wir witam kekociciriw.
Claudie -	Ni ka masinahen ia ohwe?
Waban-Rodrigue-Marilou -	Ehe.

E masinahikatek ke aitwaniwok

Ka m. -	Tante ke totamekw kaskina kitci mikawiekw ka iteiekw kekotc ke ici oreritamekw mekwata e arimweiekw? Ki ka ia ni masinahenawaw?
Waban -	Arimatc kiapatc kata awik ke masinahak e itwaniwonik.
Ka m. -	Awin tca ke masinahak?
Marilou -	Nin, nama ni tapi kackitan.
Claudie -	Aci ia kit ickwa itotiskan anihwe towi?
Marilou -	Nama, Ni kiskeriten aric aka kitci kackitaian.
Rodrigue -	Itotiskeine ekote ke otci kackitaiin.
Waban -	Ki ka witamatinan ke iti masinahaman. Ekote meka tca aiackotc tca ki ka aitotiskanano kaskina ke iti orisinahamokw.
Claudie-Rodrigue-	Ehe, Aiackotc.

Ke itotiskaniwok

Ka m. -	Kata mitceniw ni ke otamirotatcik aniki nta ke apitcik. Tan tca ke totamekw kitci mamatanamatoekw otamirowin.
Waban -	Nin e iteritaman kirawe kata miroparin kaskina awik wiec kitci ici otamirotc.
Claudie -	Nia wesawirni! Sama ni arimatc kaskina awik tapickotc kekwariw kata aitotam. Nama meka ni ko mitowi ka apicicitcik ka kiskinohamowakaniwitcik. Nama wiskatc anihwe kir ki otci itotiskan, Tapickotc kekocic kitci otamirotakaniwok. Mamiritonaniwon meka ni ko ke aitotiskaniwok e iti wawitamatonaniwok kekocic.

Waban -	Matci a ni ki ka ki witen tan e iteritaman aka arimatc kitci micta kicitamahiin.
Rodrigue -	Ni nataweriten ia kaskina awik kitci kiskeritak.
Waban -	Niah! Wesa wir ni! Kecpin tatawe neta ka ici witci otamiromiwetcik aka e kiskeritakik kekwan ka ici otamironaniwonik. Mictahi mirowinakon e ici otamironaniwok. .
Marilou -	Kiapatc tawok aka ka nahitatotcik! Nama ni aiarimowewok, kikatowok ni!
Claudie -	Kekwan tca kir ka wi itein? Micta wetan ni aka awik e witak minawatc tca kitci itetc « Ah! Nama miroparin»

Ka m. -	Tok! Tok ! Tok ! Kecpin tca pekatisinaniwok memantcic!

E nahitatonaniwok

Ka m. -	Nit iteriten takon kekocic e kictapatak aka moci e ki otci orictatoekw kitci nosanetaiekw.
Ka otamirotatcik-	(Nama kitonaniwon)
Ka m. -	Nama takon kekocic ke witamekw?
Marilou -	Arimatc kata witcikatew kekocic aka kitci kikatonaniwok.
Ka m. -	Tan tca ke totamekw aka kitci kikatoiekw?
Ka otamirotatcik-	(Nama kitonaniwon)

Ka m. -	Awik e witak kekociciriw tan tca ke totcikatek?
Waban -	Matci kata naheritcikatew kekotc kata witam awik aka e naheritak.
Rodrigue -	Matci kaie kata natotam.
Claudie -	Ehe, Arimatc aric kirika kata witam awik!
Waban -	Ka wi itetc Rodrigue, nit iteriten, epwamoci kotc ici naskamotc awik patama kata mamitoneritam wa itetc.
Claudie -	Kackitaw ni Rodrigue wir tipirawe kitci witak kekwariw ka wi itetc.
Waban -	Claudie, patam kaie kir ki ka ponitam anihwe ka totam. Nama kata ki witcikatew kekocic mocak tecikotc ki kikawoten mia sa ko kitci otamihikeiin.
Claudie -	Ekote meka tca! Mamitoneritekasota tca patama misawatc e kiskeritamokw wa iteiikw. Nama ni kinec e mamitoneritcikatek ko.
Rodrigue -	Ehe, nanikotin kinec ni. Matci mani nanikotin mia kekocic ici mamitoneritcikatew takon aric kaie kekocica kinecicic e mamitoneritcikatek ekote nanikotin wetci wapatcikatek aka mia e wi ici oreritcikatek.
Marilou -	Kecpin e takok kekocic e mirowacik e witcikatek tecikotc aniki kotakahik wapatamokw e mirwacinik nama arimatc kinec tacikatew kitci naheritcikatek.
Ka m. -	Kekocic ni wi kokwetcikemon : Kecpin aka wi nahipariekwe mekwata e otamirotaiekw ka wi pamatisiekw tan tca kit iteritenawaw ke ispariekw mekwata pa matisiekwe?
Ka otamirotatcik -	Kata matciparin mictahi!
Ka m. -	Arimatc meka tca ki ka otamirotanawaw aka ni kitci ispariekw aka kitci natawapatamekw mekwata ka taci otamirotaiekw.

Kicteritickewin

Ka m. -	Anihwe nictam ka kictapatak ke nosanetaiekw kitci kicterimitoiekw. Kekwan anihwe kit iteritenawaw kirawaw kicteritcikewin ?
Marilou:	Awik kekociciriw ka witak kitci kicterimakaniwitc.
Ka m. -	Ehe, Tante tca ke otci kiskeritcikatek e kicterimakaniwitc.
Rodrigue -	Aka e kisiskamakaniwitc kekociciriw e witak.
Ka m. -	Awik e acitemakaniwitc eko a ni aka e kicterimakaniwitc.
Claudie -	Mia sa ekote.
Waban -	Nama. Aric kirika tan ni mia e itakaniwitc.
Ka m. -	Tan tca mia ke ki itakaniwitc ?
Waban -	Aka kitci kisiskamakaniwitc.
Marilou -	Aka kaie kitci wikokwe kanewitc awik aspinikotc.
Rodrigue -	Kitci kicteritcikaterik kaie wir awik tan e ici wapatak kekociciriw misawatc aka e naheritcikaterik.
Ka m. -	Ekote ma tca. Matci ia ki ka ki kiwe kanawapatenano kaskina ka ki orisinahamokw kaskina.

Irakonikewinicica
Tatwaw e mawotcihitonaniwok	E orapamakaniwitc ke mitatc E orapamakaniwitc ke masinahak e itwaniwonik Kicteritcikewin, Sikiskimiwewin, Pekaterimowin

Ke ici nosanetakaniwok irakonikewin

Ka m. -	Mamitcic peikw kekocic ni wi kokwetcikemon. Tapwe kicteritakon kekocic e actakaniwok kitci nosanetakaniwok aric ki ka kackitanawaw ia kitci nosanetaiekw?
Marilou -	Kecpin wi kictaikwe arimatc kaskina awik kata nosanetaw ke ici orisinahomokw irakonikewin.
Ka m. -	Ni ta mireriten ni kaskina awik kitci naskamotc.
Waban -	Ehe. Ni ka nosanetan irakonikewina.
Claudie :	Ni ka kotcitan.
Ka m. -	Nama tepirak ki ka kotcitan arimatc ki ka nosanetan.
Claudie -	Ekote ka wi iteiapan.
	Rodrigue icpiniskeriw :
Ka m. -	Kekwan, Rodrigue?
Rodrigue -	Kecpin kaskina awik nosanetate irakonikewiniw aka awik wi pacitcickakete, ni ka kackitan kaie kiapatc kitci witcihiweian.
Claudie -	Nama meka ni, Nama awik wi tiperitam.
Waban -	Kata ni miroparin.
Ka m. -	Ekote meka tca ! Aci ni ka matcan kit iterimitinawaw ki micta ro kitciparinawaw.
Ka otamirotatcik-	Mikwetc.

Ka ici kokwasikeritak Marilou

Ka ickwa matcatc ka mitatc awaciwikiwamiriw

Marilou -	Natotacikw sa. Mia sa kitci ponitaian nin. Nama ni wapamitison neta nin kitci apian.
Waban -	Kekwan wetci itein?
Marilou -	Kitci masinahaman e aitwaniwok, kitci nanahipataman,anihwe kaskina ke aitotiskaniwok namiew ni nin otci.
Claudie -	Nia, Marilou. E ki tca ititak kitci witcihitak.
Marilou -	Ni ka micta oniparin.
Waban -	Kekwan wetci micta arimeritaman anihwe otci? Nama taw ota awik aci niheriw e ki itotisketc. Tapickotc kaskina ki ka iti kokwetcitanano.
Marilou -	Ni kiskeriten e wi witcihiekw aric nama ni ni ka kackitan.
Claudie -	Aka micta arimerita anihwe otci.Marilou. Osam ni ki taci micta arimeriten.
Marilou -	Nama ni ki kiskeritenawaw kirawaw. Nanikotin tekaci ni onockaweriten nama tca kaie ni nataweriten tekaci kitci natawaparik ohwe ka taci otamirotaiikw nin otci. (Mato.)
Rodrigue -	Aka sekisi, Marilou.Namiew kir ka totaman wetci aka miroparinaniwok ota kaskina wiec.
Waban -	Ekoni erowek patama anotc mictahi ki otamironano anotc. Ekoni aci kaskina ke ici kiweiikw.Kecko minawatc mawotcihitowiikwe ki ka aiarimotenano.
Marilou -	Nama ni kiskeriten ke apitc ma kiapatc pe icaian.
Waban -	Marilou ! Akawir nte totacinan. Kaskina ki ka tacikanano kiapatc kaie kir kaie. Kecpin aka tacikeine ki ka natcipihitinan. Micta pakisakik ki ka aritinan kitci pe iciwiritak.
Marilou -	Eko meka tca aci arimatc kaie nin kitci pe icaian. Ekote ia ni.
Rodrigue -	Ekote! Arimatc!

Marilou -	Ki micta osameriminawatake.
Waban -	Kecpin kir, E osameritakosiin, Ekoni kaie nin e iteritakosian. Mia kir ka iteritakosiin. Nama tca kircike ki ka pa tacikan.
Claudie -	Petcimote. Tapickotc ki ka iti pimotanano.
Marilou -	OK

Kekwariw wetci koctak Marilou aka kitci kackitatc ke itotisketc ? Kekwariw kit iteriten ka otamihikotc ?
Arimipariw	1. E kiskinohamasotc 2. E mamitoneritak. 3. E osamikak kekwariw . 4. Kokwasikeritam kekwariw .