7. E mawotcihakaniwitcik awenak

Aci eckam iti aieskosiwok Marilou kirika Wapan esko ki positcik neta kitci nisawitatcik. Ki wicakemowok kitci tipatcimoctaketcik ka wi totakik acitc e wi mawotcitatcik icinikasowiniw aniki ka wi nta pamiparitcik. Nakickowew Marilou Wabana e aiatisokwatc e ici arimiparitc opimatisiwinik acitc tan ni e aiterimotc.

E witakik ite ke icatcik

Wetci otamiromiwetc

Ka nta pamiparitc	-Tante ke icaniwok?
Wetci ota. -	E ickwa kanawapatamak ite ke ki icaniwok aci tca ni ki ickwa oreritenan tante ke icaniwok nete tca France kata icaniwon. Enko ka ki orapitamak.
Ka nta pa.-	Kekwan tca?
Wetci ota. -	Micta kice mirwacin ke ki pa aicaniwok micta kaie mitceno
Ka nta pa. -	Tan apitc ke matcaniwok?

Wetci ota. -	Iti ickwaparite otehimin pisimw.
Ka nta pa. -	Awin aniki tca ke icatcik?
Wetci ota. -	Aniki ka pe witcihiwetcik acitc aniki ka wi pa icatcik, aric takon ka ki actaiikw ke nosanetakaniwok. Nictino tca.
Ka nta pa. -	Tan tca wa itemakak.

Wetci ota. -	Anihe nictam : Kaskina awik kata witcihiwew. Kitci witcihiwetc e weritakaniwonik acitc kitci witcihiwetc e mowotci coriawaniwonik. Ki ici naheritenawaw ia ohwe?
Ka nta pa. -	Kekwan tca ka nataweritakok?
Wetci ota.-	Arimatc kata witcihiwew e nanto coriawaniwonik. Kecpin micta mitcetiwokwe kirawe kata miroparin kirawe kata kiciparin.

Ka nta pa. -	Tan tca ke totamokw?
Wetci ota. -	Ki ka tcipakwanano kitci atawewok tcipakwan. Mitowi : spaktci. Enko tca ke otci kitciparitaiikw. Acitc kape pipona ki ka mawotcitanano opotai acitc pwetewapiskwa ke atawewok.
Ka nta pa. -	Nama wiskatc ki ka tipiparinano tepirak anihe totamokwe.

Wetci ota. -	Kotak kirika kekocic ki ka totenano : kaskina e taciwok ki ka atoskectakanano, mitowi kitci pa nahactasoiikw mikiwamiskak. Kitci pa kanonawassoiikw, kitci tcipakokeiikw kitci ataweiikw. Kecpin awik wi nataweritake tepirak kotc ki ka pe witamakowinano kirano tca ki ka wectamakanano.
Ka nta pa. -	Ickwecak otci aniheriw.
Wetci ota. -	Tawok ni kaie ockinikicicak niheriw ka totakik. Matci aric kaie ki ka ki pa witcihiweian e ocitakaniwok kekocic e pikoparik kekotc e cicopekahikaniwok, osapwakan kisisipatakaniwok,e tackahitaniwok, e mikarapinaniwok ke ma kotc e atawaniwok karocic kitci tawihikaniwok .
Ka nta pa. -	Pe icakeikw nimikiwamik. Ni wi ocitan kekocic nimikiwamik atamitak nte. Anihe ko nte ke otci aitapinaniwok . Tour d’observation ka icinikatek emitikocimonaniwok.
Ka nta pa. -	Ki wi nanakatcihawok ia otcewok e akockicinitcik.
Ka nta pa. -	Tan tca irikik ke miriak?
Ka nta pa. -	Micta kakonac acitc tcotcocanapo. Tatwaw mitato otcewok. Ekote ia ni.
Ka nta pa. -	Ekoci meka tca kir pe nta cicopekahekan atimokiwam oskan tca peikw ki ka miritin kitci mirwapiteiin.
Wetci ota. -	Ok, ekote kecko nte ki ka aiarimotenawaw anihe.
Wetci ota. -	Matci ni kaie ki ka atawanano awacak kekociciriw ke ocitatcik.
Ka nta pa. -	Nama awik kata otapinam.
Wetci ota. -	Arimatc meka ki ka kotcitanano. Kecpin aka kekocic wi kotcitaiikwe nama awik ki ka witcihikono. Tapwe meka ni kirika ki ka natweritamakanano coria arimatc aric kirika ki ka totenano kitci wapatariwewanano e kackitaiikw e mawotcitaiikw coria. Kecpin tca takonokwe kotak kekocic ka kiskeritamekw ke ki totamokw. Ekoci witamokw!
Ka nta pa. -	Kitci nakamonaniwok kitci akitamakeiikw e pitakaniwok.
Ka nta pa. -	Bingo.
Ka nta pa. -	Kitci kisisipataiikw otapana.
Wetci ota. -	Ki wapatenawaw micta mitceno kekocic ke ki totamokw.
Ka nta pa. -	Awin tca ke ocitatc aniheriw kaskina.
Wetci ota. -	Tapickotc kaskina kirano. Ki ka mawotcihitonano kitci aiarimotamokw tan ke ici otamiroiikw.
Wetci ota. -	Anihe tca kotak ke nosanetaiikw. Kaskina neta ka apitcik kitci witcihiwetcik wewerita kitci nanto kiskeritakik kitci miroparik ite wa icaiikw. Enko ka ici nataweritakok kaskina wewerita awik kitci petaketc mia kitci iciweriikw. Aka werita e werinaniwok e wi matcaniwok nama tekaci saperitakon.
Wetci ota. -	Kecpin awik aka e saperitak ekote wetci aka kotakahik wi saperitakik e wapamatcik kotakahi awiriwa aka e saperitamiritci.
Wetci ota. -	Kecpin kaie awik aka e tapi saperitak kitci nanto kiskeritak tante e wi icatc ekoni e kiskeritakositc aka e wi nta pamiparitc. Tan kirawaw e ici wapatamekw anihe?
Ka nta pa. -	Ehe, nahinakon ka iteiin.
Wetci ota. -	Minawatc tca anihe kotak irakonikewin. Enko anihwe ka icinikatek, NAMA AWIK KATA OTAPINAM MATCI MACKIKIRIW.
Ka nta pa. -	Awin aniheriw ka ki oreritak?

Wetci ota. -	Ohwe ka wi pamipawok aniki kirika awaciwikiwam pe witcihiwewok e otamirotakaniwonik. Enko tca anihe ka nosanetakaniwok neta pitakamik nama ni ocki kekocic ki actanano irakonikewinik. Ki ici naheritenawaw ia?
Ka nta pa. -	Ehe.
Ka nta pa. -	Tante tca ke totamekw kitci kiskerimaiekw awik e otapinak matci mackikiriw? Kekotc aka e otapinak?
Wetci ota. -	Tecikotc meka ni kiskeritakosiw awik. Nama arimatc ki ka micta pa nanakatcihanowok. Tepirak wewerita kitci nisitotakok wa ici actaiikw kitci nosanetik. Kecpin wapamikoiikwe e micta otapinamokw matci mackiki ekoni ke itikoiikw «kecpin wi ocoriamiwate ke matce paritcik tepirak kata ponitawok e otapinakik matci mackikiriw» nama tca ki ka wi witcihikonano.

Iteritam Marilou ni wecimikw Waban


Waban-	Ki miro pimatisin ia?
Marilou-	Erowek. Kir tca?
Waban-	Ehe, ni miroparin. Ki wi aimihitai?
Marilou-	Ehe…Ni ki micta kockoparin awoctakocik ka wapamitan nete Victor omikiwamik.
Waban-	Ki kiskeriten ia, Mani mia tapwe nama ni mocak nte nit ican.
Marilou-	Kecpin aric e icaiin nama ni ceckwatc kit ican. Mia sa tapwe micta sikar e taci takonitapan.
Waban-	Ehe, ni ki meka tca tapwe micta mirokakowitai. Natota sa Marilou, ni micta sa ni arimeritamihikon tapwe nihe. Tapwe ni nama actepan kitci pa tacikeian neta. Nama actepan kitci pa totaman nihe.
Marilou-	Kir meka ni ka wi totaman ki ka toten nama ni wiec nin nit iteriten.
Waban-	Ki ni wapamitin aka e mireritamopan e wapamiin neta kaie nin.
Marilou-	Actepan meka ni kaie kir neta kitci pa tacikeiin.Mitowi nin.
Waban-	Namiew anihe tepirak kitci witamoin wetci wi pa wapamipan.
Marilou-	Awoctakocik, ki ki arimotamatin ka ici aramiparian. Ka tca pe natotowin mia sa kir tekaci anihe aka e arimihikoin ekoni ka totaman anotc tca ki wapamitin kaie kir enko ka arimihikoin kaie kir.
Waban-	Nama wiskatc ni ki otci itwan nama nin ni otapinen matci mackiki.
Marilou-	Nama, aric mekwatc ka atisokatan tepirak kotc ki natotowin aka tca e ki otci witamowin. Ni ki iteriten nama wir arimihiko matci mackikiriw. Ka ickwa kaie arimweiikw ki taci micta mirowockinikicicitai ni tca mia ko awik ka taci micta arimihikotc matci mackikiriw.
Waban-	Natota sa Marilou, Nama ni e wi apinehotak aric ma e wi witcihitak.
Marilou-	Kit iteriten ia tca, ka ki ickwa witamatan Victor otci. Tan e pe aitotowoitc? Tecikotc kir ki nta wawitamowaw. Kit iteriten ia tca ni witcihikon? Aric ni wapaten ni, tekaci ni nama ki wi pa merimin.
Waban-	Nama ni ki atwamitin. Nama ni kaie wiskatc ni ki otci aiatisokwaw ka ki pe iciin.
Marilou-	Kirakec sa. Ni ta mireriten kiskeritaman tan apitc ke aiarimotamokw kir tan e ispariin. Tapickotc aniki kirika ka mamo otamiroiikw.
Waban-	Ki witamatin aric tapwe ni pitcerika ka sakosawakeian nin naha towi.
Marilou-	Aka pe iterimici nama kekociciriw kiskeritam. Kecpin e pactenewaniwok misawatc pitcerika kekotc aci micta mitcetwa. Nama wiec pitoc icinakon.
Waban-	Nama ketcinatc ki mireritenatake ni e ititan. Wetci aric ititan nama wiskatc ni ki otci pitoc itatisin nin e witci otamiromiweian.
Marilou-	Anihe tca tapwe ke totamokw tepirak kotc aka kitci kiskeritakosiikw e pactoneiikw. Enko ni tepirak ke ki nisitotamokw.
Waban-	Nama ni, anihe ke miroparik kitci ni nosanetaiikw wewerita kitci miropaiikw e otamiroiikw. Ki itwanano nama ki ka takonike irinikasonano. Tepirak tca aka kitci onikeiin kaie kir ni ki tacikatai nete Victor omikiwamik nama kaie ki otci mimicimitin.
Marilou-	Ehe, tapwe ni tacikatai, aric ki witamatitai e wi ponitaian aci nin. Nama ni wetan. Mictahi ni witcihikotai e wapamitakok aka kirawaw e otapinamekw matci mackiki. Aric ka ki ici wapamitan…
Waban-	Ni cikeriten, Marilou.

Marilou-	Waban, ohwe ka ki otciparik otamirowin, kir ni ka ki wi otamirotaiin, kir ka wi pamipariin, kir ka ki oraratcik ke witcihiskik. Kir tca kotc ka wi totaman. Matcaci!
Waban-	Nictam, ehe. Aric anotc, kirano ni kaskina anihe aci. Anotc ka ki ici otamirotaiikw. Aka matca, Marilou. Ki ka aiarimotenano.
Marilou-	Nama aci kekocic nin takon ke iteian. Matcaci Waban!

Tapwe ia Marilou aniheriw ka totak ?
Nama	Nama	Ehe
Wir ni acteriw kitci otamirotatc ka ici arimiparitc.	Aka e witak tapwe kekociciriw wir otci. Ki tca itiko Waban teka apitc tapwe kitci witcihikotc.	Aci takonipan ka arimihikotc Marilou kekociciriw epwamoci neta taciketc.	Ki itepan aka aci kitci otapinak matci mackikiriw kitci ponitatc. Kirika tca e ki itespan aniheriw e wi pa okwimesimatc aka kekociciriw ka otapinamiritci.