16. Marilou otawiwa

Kipohotokamikok kotcitaw Harold kitci witapimiwetc e mawotcihitonaniwonik. Natawapamew ka mitaritci kitci atisokwatc tan kaie wir ka pe ici pimotetc opimatisiwinik.

Marilou otawia (Harold) tekaci nama kito e waskapinaniwonik e aiarimwaniwonik.

Mitato acitc niaran tato pisimwa irikik kata kipohwakaniwiriw Marilou otawia. Matci aric ni kata atciwinikateriw kecpin nataweritake kitci icatc nte ko ka iciniwok kitci witcihakaniwitc awik kitci ponitatc e otapinak matci mackikiriw. Ki tca nataweritam kitci nta witapimiwetc e mawotcihitonaniwonik e natowi kackihonaniwonik.

Ekota nta pitamik kipohotokamikok e taci mawotcihitonaniwok e waskapinaniwok. Aiackotc iriniwok e aiarimwetcik.

Animateur - Kir tca ,Harold, takon ia kekocic wa itein?
Harold - Nama ni kiskeriten.
Anim - Nama ni awik wekockatc itakaniwiw.
Harold - Nama kekocic petciparin kitci witaman.

	Mitcetwaw aci mawotcihitowok, ekoni tca mocak peikonok e isparinik : Tekaci nama kito Harold. Nac nikotin e kicikarik, aci aniki wirawaw kotakahik ickwa arimwewok, itew anaha ka mitatc :
Anim -	Tan tca, Harold, Takon ia kekocic wa itein anotc?
Harold -	Nin, wetci tacikeian ota osam ni micta matci iriniwin. Actew tca ota ki tacikeian ni e ki totaman. Kirika aric nama wiec nit iteriten. Nin ka totaman wetci tacikeian ota. Ni ka tca tacikan irikik e actek kitci tacikeian ota.
Anim -	Orowine tca ota aci tan ni kit iteriten ke itatisiin?
Harold -	Mitowi anotc ka itatisian.
Anim -	Minawatc takocinine nete ka ici tacikein, eko ia ni ke totaman kiapatc ka totamopan epwamoci ota pe icain?
Harold -	(Nama kito) E iteian nama wiec nit iteriten tepirak ni e arimweian anihe ka iteian. Matci awik ni ta itikw kecpin kiapatc nte ici wapatamone anihe ka itein« kecpin kiapatc anihe iteine anotcikwetc ki ka pakicinin kitci nipoin.» Tekaci nama wiec ni ta iteriten.
Anim -	Nama awik ki ka pe nta nanipowictakw kitci tca itiskw aci ki ka nipon. Ekoni e itactek kiapatc kitci pimatisiin kitci petowatc kitehi e pakahatc kiapatc. Anotc aci mekwata kekwan ka ki ici patahaman aka wirawatc kitci petowatc kitehi?
Harold -	(Nama kito)
Anim -	Ni ka wawiten atita kekocica. Pe tca witamacikw ke apitc takonokwe neta ka wapatamekw e totakoiekw aka kitci petamekw kitehiwaw e pakahamakak : Macihiwewin e apatcitaiekw awik e akohekw?
Harold -	(Nama kitonaniwon)
Anim -	Aka awik e wi miwotatc ka acterik ke itotisketc?
Harold -	(Nama kitonaniwon)
Anim -	Ickotewapao, matci mackiki?
Harold -	(Nama kitonaniwon)
Anim -	Coria ka metowakaniwok?
Harold -	(Nama kitonaniwon)
Anim -	E ocimotakaniwok? Mitceto kickwa ocimonaniwon? Kata natowi totamokw wirawaw awacak, minawatc wir anaha iskwew kata kiskeritam ke aitotak…
Harold -	(Nama kitonaniwon)
Un participant -	Kaie nin, ekoni ka ki icinakosian. Kaskina awik kicowasictowatai, wawatc tekaci ni wi pikotasotai. Nanikotin, pitoc nit iterimotai : marotc ni iteritetai kaskina kekocic nama kekocic ni takickakotai peikon aric mocak ki pe moskiparin. Mocak ni ki kicowasin. Nac ni ki iti kiskeriten nin ka taci kocwahitisoian, nin ka taci nekatcihitisoian. Ekota tca ka otci meckotatisian.Nama aric moci orina ekoni wetci ota kiapatc ki pe takocinian. Ni ki aric ititison enko ohwe mamitcitc ke pe icaian ota.

Pe masinahikewok nete France ka ki icatcik

Awin ka iciticahamowakaniwitc :

Kwei kaskina,

Anotc mekwata France ni pa tacikanan. Ni ki icanan Paris, Versailles acitc anihe ka icikatek château de Chenonceau. Neta ni ici tacikanan ka ocki pimatisitcik ko ka ici tacikehakaniwitcik e pa pimatisitcik. Micta mitcetiwok awiniki ka pa wapamikitcik kaskina wiec e pe ototetcik. Ni ki pa kipacimonan acitc ni ki pamiparinan.

Wapake tca, ni ka nakickowimwanan M. Berthelot octesa okimawiriw neta otenamiwak. Minawatc tca nte napitc cawonok ni ka ici nta pamiparinan. Ki micta mamitonerimitinan (nanikotin aric tepirak Ah! Ah!) ni micta pakoseritamwananak kotakahik kaie wirawa kitci totakik ohweriw mitowi ninan.

Béatrice, Simon, Waban, Karine, Conrad, Jason, Valentine, Éric, Marilou, acitc kaskina kotakahik.

E itatisokasoritci Marilou otawia

Aci kekatc peiko pipona kipohwakaniwiw Harold.

Anim -	Ki wi wapamitai.
Harold -	Ehe, nama moci ni naherimon kitci arimweian e mitcetinaniwok. Nama nac takon ke iteian.
Anim -	Aiatisokaci memantic tan kir e ici pimatisiin. Tante pe wetciin? Tante ka taci matcekiin?
Harold -	Nin, ni nehirowisiin. Ka awaciian notcimik ni ki aitacikahikoin e nipik. E miroskamik acitc e takwakik ko kirika. Nanikotin ko otamirocipan notawi otenak. Nama aric ko tapwe ni wapatetan coria osam e micta minikwespan notawi. Ni nta wepahapatan, ni nta atoskatan aci e takokipan minic ni mowisotan kitci ataweiak acitc ke mitciak. E takwakik ko ni mawotcitatan ke mitciak kinec kitci tipipariak anihe tca ko tepirak ka takokipan ka acakaniwok coria masinahikan. Erowek ni ko ni kackihotan. Kecpin ko kirika e miroparinikipan nikawi kitci ocihatc pakekina ocitapan ko pakekineskisiniw kitci atawetc kitci otci coriakecitc. Kiskinohamatokamikok ko nit icatai neta noteminak ka ici takokipan. Erowek ko cowat nit iteritetai e icaiapan kiskinohamatokamikok. Notcimik meka nin mocak ka ki ici miskaman ke ici mirwatcitaian. Wiec tca new ka ici pitakeian ka kiskeritaman ka arimak e takickakoin. Pitoc nte pe ototepan mictahi tca nosanetapan irakonikewina. Nanikotin nama ni nisitowatan e pe aimihimitc petak meka tepirak emitikocimopan. Nama tca ni kackitai kitci nosanehok aka kaskina e nisistotaman. Ekotca ko e micta tactakatamapan.
Anim -	Epwamoci tca new ici pitcakein tan tca ko e isparikipan?
Harold -	Tapanak ko ka nehirowisitcik ka kiskinohamaketcik. Emitikocimowik aric nit ici kiskinohamakowitan, ekoni e aicinakokipan nimasinahikanana kecpin tca ko aka nisitotamakipan matci ko ni pe witcihikotananak e pe nehirowimotcik.
Anim -	Kaa!
Harold -	Nac e ki iti micta arimisian. Ni ki orowitcicohokoin e kiskinohamakoan. Wirata ko nit itikotai nikawi kitci sapitamok minawatc wir notawi micta ni ko tepirak witeritamopan. Ki meka wir matcewirakaniwiw ka matcewirakaniwitcik weckatc e nta kiskinohamwakaniwitcik micta warowik. Nama tca wiskatc ki otci sakitaw kiskinohamatokamikoriw. Peikwa e miroskamik nicto kickwa ni ki orowitcicohokoin ni ki micta mireriten ni ki meka tca arowepin. Orowitamik ni pa aitacikatai e pa kitotakeian. Ka tca iti nicto kicikak ni tca apitc orina ni kicwahatai notawi orina kaie icinakosipan e ki mikwespan ni ki pe makonikotai e tca pe icispan« nama aci tekaci ki wi wapamitin ota mekwata e kiskinohamakaniwok.» Ni ki micta pe otamohokotai e ki tca kirika namehowitc.
Anim -	Ki ia tca pitoc kekocic isparin?
Harold -	Nama minawatc wiskatc ni ki otci orowitcicohokoin. Aric nin atamik, mocak ni ki cikeriten kiskinohamatokamikw acitc aniki kaskina ka tiperitakik kiskinohamatokamikoriw.
Anim -	Ki wi itwan ia kaskina ka mitatcik kiskinohamatokamikoriw.
Harold -	Euh…ouais. Ni ki micta iti matci iriniin. Mocak ni ki mikason. Ni koctikotaikw ka kiskinohamaketcik.
Anim -	Kirika tca atamik e wi naskwataman ka ki aitotaskw kotawi.
Harold -	Potc kwecan ekote.
Anim -	Takonokopan tca ketcinatc ka arimihikoin e kiskinohamasoin.
Harold -	Erowek ni peikon ni kackihotai. Tapan meka nimis e micta kackitaspan e kiskinohamowakaniwitc ni micta tca miro witcihikotai e ocitawok notamirowina nimikiwaminak. Ekote ni erowek ka ki otci kackihoan. Nac aric warowik ka iti itaitaian mamik ni ki iciticohokoin.
Anim -	Tan tca ka ki isparik.
Harold -	E kickowepitc notawi enkeriw mocak ka ki arimotak : « Kirano e nehirowisiikw nama wiec kit irapatisinano, nama ki sapikitakosinano» Nit iteriten tca ko anotc aniheriw ka wi itespan orina e masikitakositc nehirowisiw ekoni ka ki ici nisitotaman e kiskinohamakoian. Ka takocinian neta micta arimisin ni ki wapaten micta warowik e nakatcipahikoin wiec nicto pipona otananik. Tekaci nama ni nisitotetai ka tapwataman e apitc micta arimisiapan. E ici pe mirispan ko ka kiskinohamaketc ka micta awaciwiritci ka ici mirakaniwitcik omasinahikaniwaw. Ka pe kickwaw tepirak ni masinahikatai. Mia sa ko awik ka kiwockwatisitc e iteritakosiapan. Irin tca ko e itespan. « Naha wir ka apitc nama ni mitowi kirano nehirowisiw ni wir naha ekoni pitoc wetci icinakositc.» Ni ta ki micta mireriten kitci wapamakik aniki kaskina notcimik tca kitci aitaciketcik. Ekoni potc ke ke ici nipowaspan epwamoci cikitcik. Anotc meka erowek ni witcihakaniwok awacak nama mitowi weckatc.
Anim -	Aka anaha e kanawapamatc ka kiskinohamaketc, tan tca ko e ispariekopan aniki kirika kotakahik ka witcipitakematcik?
Harold -	Mocak ki mareritakosin. Nama wiskatc wiec ni ki otci itwan. Aric ma peikwaw peikw nta osam pecotcik ni ki pe natawapamikw orowitamik e pa metoweiak. Ni ki makonaw ka tca pakitanak nama aci kackitapan wiec kitci pe icitc. Tecikotc ki pe takociniriw onikihikwa kiskinohamatokamikok e pe mowinehikeritci. E ki tca iteritci« Aci taci osamihakaniwok ninitcanicinanak nehirowisiwa ka taci aitotakotcik nama tepirak ni ka kanawapamananak ninan. » Ni ki tca orowitacihokoin nicorakana irikik. Aric kirika ka ki isparik orina ko ni aitacikakowitai e ickwa kiskinohamakaniwok ni naskowatai aric. Nama tca minawatc ni ki otci orowitacihokoin. Ekota tca nta ka ki kiskeritakik aka kitci pamerimitcik e ki naskowikik. Nama awik aci ni pe aimihikotai nama kaie wirawatc ni pe kanawapamikotiikw. Nama potc aci ni tawonakopan wirawaw otci.

À l'école secondaire, diriez-vousqu'Harold a subi du racisme ?

Non.
Les élèves marginaux ont malheureusement souventce genre de problème.

Oui.
Il était victime de harcèlement parce qu'il était Indien.Des parents parlaient de lui comme un Sauvage.

Anim -

Nama wiskatc awik ki otci arimotamowaw?

Harold -

Wirata memacic ki taw peikw e ki okwimesian. Kaie wir ni mocak ki pa peikociw. Pe ni ki nta wepahapepanak kirika otawia nte ko ka ici tacikeiakipan. Kiskeritamopan tca ite pe ototewok kaie wir micta sakitapan notcimik e pa aitaciketc. Ni ta airimotetan tca ko anihe ka aiciwepasiak. Kek nikotin ki matcatikewok nama tca wiskatc minawatc ni ki otci wapamaw. Minawatc anihe ka iti ocki pipok tepirak asko ka nipa aimihananiwok ni ki kackitan kitci icaian e kiskinohamakaniwok. Ka ki tca itikik ninikihikok mekwata e arowepinaniwok « nama kekocic ni kiskinohamakoin tepirak kotc ni papirotakoin nama kaie aci ni ka ican nete».

Que peut-on dire du parcours scolaire d'Harold ?	VRAI	FAUX
Il n'a pas eu toute l'aide dont il aurait eu besoin.
Il manquait de persévérance.
Son père aurait dû l'encourager à mieux faire.

Anim -	Ki micta ariman ka ki ici pimotein! Tan e tato piponesiipan ni apitc?
Harold -	Mitato acitc new ni tato piponesitai ni apitc. Notcimik tca ni ki pa matisin nac ka ickwa peiko piponikak ni ki iti cikateriten. Peikon kaie neta notenamik nama takonopan kekocic ke ki aititoskein kitci ki onockaweritaman. Ni ki tca minawatc kiwe atikan mamik nimocomecik ni ki nta tacikan. Nte tca ni ki iciwirikok peikw nte e kiskerimatcik e takonikipan ke ki ici otamirohitc. Kekociriw ko nte e ocitaspan mictikwa nte e irapatcihatc. Wiec tca nicto pipona ni ki otamiron neta. Mitowi potc e ki taci kiskinohamasoian e ni e ici otamironaniwok. Ekota ka ki otinaman anotc e ici kackitaian e otamiroan mictikw e totowakaniwitc. Ni miroparihitotan kirika anaha kice iriniw.
Anim -	Ki ia tca minawatc ican e kiskinohamakoin?
Harold -	Ka ki ni aitotaman minawatc, ekota ka kiskerimak niwirimocec. Ni kiwatai tca ko nicwa e peiko pisimoweiak. Wirata ni ki iteritai kitci koski icaian ki aric iti kanawerimawaso niwirimocec. Nac tca kirawe ka iti kicpotc ki nataweritam kitci witacikemak. Kirawe tca mocak ni ki kiweparin e natawapamak ni nisitotawaw kaie wir wetci ki mocak nataweritak kitci nta witacikemak. Kaie nin enko anihe ka nataweritamapan.
Anim -	Ki micta arimanotake kitci oreritaman.
Harold -	Ehe. Ekota aric nac ka iti nta witacikemak. Ka tca nitawikitc ninitcanicinan ninikihikok ni tacikatan. Notcimik ko pa aicatai. Ni mitatetai kaie notamirowin. Nama takonopan ke ki ici otamiroan neta notenamik. Ekotca ni nikotin tca ko ni witci minikwematai notawi nac tca peikwa tapwe tca ni ki kiwockwepin tekaci tca peikorkanan ni ki minikwan.
Anim -	Tapwe sa tekaci ki micta osamihitison!

Harold-

Minawatc tca, Ni ki iti oreritetai kitci nta otamiroan otenak. E ki iteritaman marotc kotc ke itetc niwirmocec. Nte tca ko ka ici otamirowapan ki kipahamokopan anahwe kice iriniw aka e ki otci kackitatc wircike kitci otamirotc osam e peikokasotc. Pitoc tca wiec ni ki ici misken kitci otamiroan. Mocak aric ni ki wi nta kiwe kiskinohamasoan kitci tatc ke okaromian e ki kiskinohamasoan. Peikwa tca e otakocik e ickwa otamiroiak, peikw tca ka witci otamiromak kitci orowiak nte tca ka ko ka ici minikwaniwok kitci icaiak. Wiec tca nicto e ickwa minikweiak aci nta karokocimew napaneca e tca nicowapekicimatc peikw wir peikw tca nin. Ekota tca nta kaie nin ka nisitotaman ka ki kitciparik nipimatisiwin micta arotc kitci iti aicinakok.

Anim -	Kekwan tca ka ki ititoskemakak?
Harold -	Enko anahe matci mackiki.
Anim -	Ok, Harold, matci minawatc kiapatc ki ka arimotenano aci kirawe ki iti kiskerimitin.

Pe iciticahamakew peikw karo masinahikan Harold

Notawi,

Mekwata France ni pa aitacikan kirika nikwimesak nte ko aitaciketcik awaciwikiwamik. Micta mireritakon, kirakec sa miropimatisiwone.
Kirika tca ka ici micta pasoweritaman kitci minawatc miroparik tapickotc kitci tacikewok tapickotc kirano kaskina e witcicanitoiikw.

Nin kitanis, Marilou