5. E tipatcimonaniwok ke ici otamironaniwok

Acteriw tca kitci oreritakik tan apitc ke tipatcimotcik. Patama tca wewerita kanawapatamokw tan ke itactatcik irakonikewiniw ke nosanetakaniwonik kitci ici matcewirakaniwitcik ke ocki pimatisitcik ke masinahotisotcik.

KA ORERITAKIK KITCI TIPATCIMOTCIK

Waban -	Micta mitcetiwok ka pe nanto kiskeritakik aniheriw ke nta pa miparinaniwok. «Kekwan tca ni mia ka taci otamirotaiekw? Awin tca ni matci ke ki icatc ?»
Marilou -	Ekoni kaie nin ni micta pe kokwetcimikoin. « Kecpin nantonite awik, kaie nin nta mireriten kitci icaian.» « Kimotc ia ni anihwe ka taci otamironaniwok ? » »
Rodrigue -	Nit iteriten arimatc aci kata aiarimotcikatepan.
Waban -	E micta tca mitcek kiapatc ke weritaiikw aka moci e kiskeritamokw acitc aka e ki otci oreritamok.
Marilou -	Nama ni wiec anihwe. Tepirak ki ka tipatcimonano kekwan ka wi totamokw minawatc tca ke iti aitotamokw ki ka iti witenano. Tan ke iti ici oreritamokw.
Claudie -	Kirawe kirano actepan kitci iti wawitamakeiikw, patok arotc kitci iti aititakaniwok..

E aiarimotcikatek awin aniki matci ke ki icatcik

Claudie -	Nama moci wiskatc ki otci aiarimotenano kekwan ke kanawapatamokw kitci ki aramaiikw ke pa miparitcik. Mitowi, nin, e ici wapataman aniki ke pe icatcik kaie wirawaw kitci pe witcihiwetcik e mawotci coriawaniwok.
Waban -	Arimatc tca kaie wirawaw kata nanto kiskeritamokw ite kotc ke wi icaiikw. Kecpin meka kirano micta miro werihitisoiekwe wirawaw tca tekaci aka kiskeritamowate e itatisokaterik ke icaiikw nama kata saperitakon tapwe.
Rodrigue -	Matci mani kaie ki ka ki actanano irakonikewin tekaci aka kitci otapinakik matci mickikiriw atcikotc tekaci nama kata ocoriamiikw. Mekwata micta mawotcicoriawokwe kata tawok ni neta ke micta onactatcik ocoriamiwaw kitci matci irapatcitatcik kirano tca kitci micta taci arimihitisoiikw e mawotcicoriakatisoiikw.
Waban -	Nama aric kaie ki ka ki taci takonike irinikasonano tepirak tca kitci pa nanakatisiwok ke apitc ma otapinakik matci mickikiriw.
Claudie -	Namiew ni anihwe ka arimihiwemakak. Anotc aci mekwata aniki tca ka ocki pimatisitcik nama ni tepirak kotcitawakewok peikwaw. Ekoni tecikotc e iti osamikakik. Matci mickikiriw ke ma kotc ickotewaporiw. Enko tca anihwe kirawe ka arimeritakok.

Tan ni kit iteriten ka ici wawitak Claudie?
Micta osami aitew.	Tapwew : ekoni ko e isparik.	Itew claudie nama ni wiec e minikwaniwok peikw napier kekotc e sakaswakaniwok nanikotin.	Kepcin Claudie iteritake nama ni wiec memantcic e otapinikatek matci mackiki. Matci kata iteritakon nama ni wir kekociriw otapinam.

Rodrigue -	Kecpin ko neta mitowi awaciwikiwamik e actatcik irakonikewiniw tekaci aka kitci pitaketc awik neta kecpin e apatcitatc anihweriw towiriw. Nama arimatc micta pananakatisiwok tecikotc meka kiskeritam awik kecpin neta icate mekwatc aniheriw e totak tecikotc itakaniwiw kitci orowitc.
Waban -	Ehe, aric aka kekociciriw e apatcitatcik matci ni icawok.

Marilou-	Matci meka ni peikwaw kata mirakaniwok misawatc ni totamowate.
Claudie-	Kekwariw ke mirakaniwitcik? Mia sa e itakaniwitcik: matci ni ki ka kimotinawaw peikwaw nama ni wiec. Tante tca ni e askotik matci ni peikwaw? Nictwaw?
Marilou-	Kekwan tca ni, Matci kimotinaniwon? Nama nte ni ki arimoten kimotiwin.
Claudie-	Tepirak meka ni e witamapan kekocic mitowi, Marilou.
Marilou-	Nama meka tca mirwacin anihe ka witaman.
Claudie -	OK. Tapwe nama mirwacin. Anihe ka wi iteian kecpin aka werita witamokwe kekwan mi aka wi nosanetaiikw aka ke mireritamokw ke totcikatek mia sa peikon e taci cikimaiikok kitci otapinakik matci kekociciriw.
Rodrigue -	Aric ma kirake, arimatc ki ka orisinahenano tecikotc. Kata wesa pe isparin anihwe. Ki mikawinawaw Victor nictam ka kitcipariwok.
Waban -	Matci meka ni ki ka ki actanano irakonikewina «Aka kitci takok ota matci mickiki», nama aric ki ka ki micta pa nanakatisinano.
Claudie -	Nama awik saperitam kitci pa micta nanakatisitc. Matci aric ki ka pa iciticahamakanano masinahikan e witamakemakak.
Rodrigue -	«Aka kitci takok ota matci mickiki», nama ni tepirak e matceparinaniwoke, epwamoci ni kirika kitci kiskeritakok anihwe awik ka wi ta pamiparitc nama kiriperitam matci mickikiriw. Tan ke icinakositcik mekwata ni totamowate kitci otapinakik matci mickikiriw ? Tan tca ke itakaniwitcik pa mawotcicoriawate? Tepirak kata itakaniwok «Aka otapinamokw mitci mickiki ki ka tca ocoriaminawaw».
Marilou -	Nin, nit iteriten anihe tepirak «aka kitci takok ota matci mickiki» nama ni tapi mackowitakon. Micta wesa ko kitaweritamokw ka ocki pimatisitcik. Micta miro nisitotamokw kekwariw e itakaniwitcik. Kecpin micta osam e itatcik aci nta arimatc ki ka micta nanakatisin.
	(Waban iteritam : « Kecpin oreritamokwe aka kitci apatak matci mackiki» ki ka totenano. Nama ni ka arimisin kitci ponitaian nama meka nipara ni otapinen nin. »

Matci mackiki acitc metowewin : Rodrigue otatisokan

Rodrigue -	Potc ki ka iteritenawaw micta osam kisiskawatcikatew« AKA KITCI TAKOK OTA MATCI MACKIKI» anihe e witcikatek, aric ma ki ka atisokatinawaw ka ki iciwepasian nin.
Rodrigue -	Ni tohan ni hockey esko nicowaso piponesian. Awasi piponok tca ki ni tawok neta ka witcimetowemakik ka ki otapinatcik mickikica epwamoci metoweiak e iteritakik kirawe tca kata miroparin. Ketcinatc ki petakanawatake, kaie nin ni ki kotcihaw.
Marilou -	Kiskeritamopan ia tca ka tiperimitakw?
Rodrigue -	Nama. Nirctam, micta mireritakon. Ki micta mirokanekason. Mia sa aka wiskatc kitci aieskosiin. Ki micta metowan. Nac aric nanake aci neta micta pitoc kit isparin.
Claudie -	Tan tca pitoc e ici isparinaniwok?
Rodrigue -	Nama ki kiskeriten tan asko ke asitciin ki micta meka naskowan osam nama wirawatc ki kiskeriten tan irikik asko ke kackitaiin enko aric anaha mickikicic ka totaskw. Nac tca ki naciwiritison tekaci ki tcakinikan ka itwaniwok. Ka ickwa nicokicikak tekaci ni nin ni ki niciworikon. Ni ki micta aieskosin. Tapwe tca. Ekoni ka ponitaian.
Waban -	Aniki tca kotakahik, enko ni ia ka ki totakik?
Rodrigue -	Taw ni neta peikw e ki micta matci iriniwitc e tohetc. Mocak akitenakaniwipan memacic e osamihiwetc. Nama tekaci natotamopan kekociciriw e witamakotc ka tiperimikoak. Peikon kaie micta otapinamopan matci mickikiriw e ickwa toheiak. Notc iterimitiopan nin ka mawotci kackitatc e tohetc, nac ki iti orepinakaniwiw. Memantcic potc kiwockweritamopan e osamihotc.
Marilou -	Kotakahik tca?
Rodrigue -	Wiec ka ickwa peiko pisimowak, ki taw e ki onapitamatc neta mekwatc e toheiak ka ici ko apinaniwok. E nokinaniwok ko nte. Arimatc tca nte ki iciwirakaniw aricapik ko ka ici wespisonaniwok. Ka ickwa tca ospesitc e micta tca nikiparitc. Mackiki irinikwecik ki iciwirakaniwiw. Mekwata asakani tekaci taci noteparikopan nipiriw aka e ki otci kiskeritak e pakotamotc. Taci pasokopan aci.
Waban -	Ni ki petakatai wirata e ki tatcik e orowepinakaniwitcik, nama aric ni kiskeritetai enko aniheriw e ki mowatcik mackikica.
Claudie -	Tapan ia tca kotak e kiskeritak aka neta e tohetc?
Rodrigue -	Nac ki iti kiskeritcikatew. Ekota tca nta ka actakaniwok anihe irakonikewin AKA KITCI TAKOK OTA MATCI MACKIKI. Ni ki pe kokwetcimik kaie notawi e apitc otapinaman anihe towi.
Marilou -	Ki ia tca witamowaw?
Rodrigue -	Ni ki itaw, ehe. Ni ki witamowaw e ki ponitaian. Ni ki tca pe itikw : «Ni micta mireriten e ki kiskeritaman kitci ponitaian. Kaskina wiec e metowaniwok nama ni anihe towi apatcitakaniwon. Kecpin e kiskeritakositc awik e apatcitatc aniheriw pitoc iterimakaniwiw acitc tca micta onactamaso opimatisiwinik itekera. Tawok meka mia e micta kackitatcik kekociciriw e totakik enkeriw aric niheriw ka taci totakotcik matci mackikiriw. Weckewakewok tca. Kirakec sa mocak mikawine anihwe. »

Marilou atisokwew Wabana

Marilou:	Matci ia ki ka arimotamatin kekocic tekaci aka kitci atisokein?
Waban:	Ehe, micta matci.
Marilou:	Nama ni arimatc ki ka natotowin.
Waban:	Matci ki ka ki aimihinan ni ka atisokan.
Marilou:	Ni wi ponitan e otapinaman matci mackiki.
Waban:	Kekwan tca ka otapinaman?
Marilou:	Ka sakosowakaniwok. Nanikotin aric ni osamikowaw tekaci e pinewepihitisoian..
Waban:	Kiskeritamokw ia ni kinikihikok?
Marilou:	Ehe, otcita kiskeritamokw. Kaie wirawaw ekoni e totakik. Ekote ka ki otci kitciparian kaie nin. Wirawaw, napaneca ni ka otapinatcik.
Waban:	Kir tca ki otapinaw ia anaha?
Marilou -	Nama. Nama wiskatc ni ki otci wi kiraperimaw anaha. Ka pe kokwetcimiekw kitci witci otamiromitakok kir kirika Claudie, ki micta sikirehinawaw. E ki iteritaman aci erowek kata takon kekocic ke itotiskeian e saperitakok acitc aka kitci pa witcewokik aniki aniheriw ka otapinakik matci mackikiriw acitc aka aspinikotc ka matciparihitotcik.
Waban -	Tan ke totaman kitci ponitaiin ?
Marilou -	Enko meka ni anihe ke witcihikoian. E pa witacikemitakok acitc kitci nta pamipariwok. Mictahi meka witcihiwemakan anihwe towi. Tapwe nama mocak wetan.
Waban -	Neta ia e tacikaniwok e mamo otamironaniwok ?
Marilou -	Euh… Ehe, e mamo otamironaniwok. Ni kiskerimitison meka aka tapwe mocak e micta saperitaman osam kaie ni arotc e ki aitotaman. Aric tapwe ni tekaci ni ponitan. Naha tca kiapatc Victor nama ni ponihikw mocak ko ni pe wi iskahamakw. Tekaci tca ko nanikotin aka e wi pamerimak wetci ko pe takocinitc e petasotc.
Waban -	Kecpin aric aka otapinamowote ekote nac ki ka iti ponihikw.
Marilou -	Nama ni wetan. Kecpin e otapinak mictahi nit iciwepohok… Kecpin tca ko pe ickwa pa miritc ni micta ni kop e arimisikakw arimatc meka ko kicikasonaniwon anha matci mackiki. Aka tca e mireritamokw itew ni ko kaskina wiec ni ka pa nta aitatisokan.
Waban -	Ni micta arimeriten anihe ka pe itatisokowin. Nama ni kiskeritetai anihe.
Marilou -	Kitci nta pamiparian, nama wiskatc anihe ni ki otci iteritetai. Wirawatc tca kitci mitcetinaniwok. Awoctakocik ka arimotcikatek anihe e wi nakahikatek matci mackiki nama orina tecikotc ni ki otci naheriten e kiskeritamapan tecikotc nin e akateparian. Aka nin kitci otci katcitapian.
Waban:	Ki ka witcihitinan. Ni ka aiarimotamowawok kotakahik.
Marilou:	Akawir! E ki tca itein nama awik ni ka arimotamowaw.
Waban:	Nama meka ni kaskina ni ka aiatisokowawok. Kitci ki meka ni mematcic kiskeritakik arimatc ni ka aiatisokowawok. Kata ni kackitawok memantcic kitci nisitotatakik. Aci kaie misawatc memantcic kiskeritamotakenak. Arimatc tca aci kata korikonikatew. Tapwerimici kata ni miroparin.