10. Aci e iti oraparik ka ki ici otamironaniwok

Remplir le sondage sur « Les ailes du rêve »

Eckam iti arimipariwok aniki ka itapitcik ka weritatcik e wi nta pamiparitcik. Rodrigue atisokew ka ki iciwepasitc apitc ka nipwekwetcik spakatciriw. Peikon kaie wirawaw waban kirika Marilou arimipariwok arimatc kata witcihakaniwiwok. Arimatc kitci kekocic kata oreritcikatew.


E nakickowatcik Claudie acitc Rodrigue tiperitamiritci
E ickwa mitcinaniwok spakatci :

Claudie à Rodrigue : Ki wi nakickakono ka tiperitak awaciwikiwamiriw minawatc mawotcihitowikwe.

E otakocinik : mawotcihitowin

Sont présents : Claudie - Rodrigue – Ka tiperitak


Coord - Tepirak ia ni ki nicinawaw?
Claudie - Mia sa ekote.
Coord - Ni petakan e tacik nta e taciekw e arimihikotcik matci mackikiriw. Ekoni wetci pa aiatisokakoan. Tapwe ia ni?
Rodrigue - Ehe.
Coord - Ki micta wi witcihitinawaw anihe ka taci otamirotaiekw aric ki kiskeritenawaw irakonikewin anihe e arimotcikatek matci mickiki. Kecpin aka anihe motetaiekwe nama sa aci ki ka ki witcihitinawaw.
Rodrigue - Nicike ni wirata taci nahiparin aci. Ni ki wapamaw anotc Marilou. Ni ki tca pe itikw nama aci nin neta ni ka tacikan ka ici mamo otamiroiikw kitci matcaiikw.
Claudie - Kekwariw tca?
Rodrigue - Aci teperitam aka misawatc e kackitatc mia kitci aitotak acitc mia kitci aiteritakositc. Wirata ni ki witamowaw aci tekaci ickwa oreritam aka aci kitci pe apitc.
Claudie - Nama ni kockoparin. Aci ni iti nokonopan. Peikon tca kaie ketcinatc Waban ekoni e iti totamokwe.
Coord - Tan tca ke totamekw?
Rodrigue - Ni ki iteritetai ni ka mitcetokasonan nirctam ka posian aric ma anotc ni wapaten tepirak e taci nicikasoiikw. Kaie tca aci nit iteriten nama aci ni ka kackitan kiapatc kitci tacikeian ota.
Claudie - E ki tca micta natcipahokok ka ocki pimatisitcik ki micta saperitamokw acitc ki micta witcihikowinano, micta keskatc tca kaskina pakitin. Mia sa arica e taci aisparik.
Rodrigue - Nama ni keskatc ni isparin aci pekatc iti kiskeritakosipan Waban e pakiterimikowikopan. Nit iteriten ni nin kotc ni ka iti takonik ke ititosketc.
Coord - Kecpin e ici mikawian, kir ni Claudie kirika Waban ka ki kitcipariekopan kitci arimotamekw ohwe ka wi matcaiikw ka wi nta pamatisiikw. Tan tca e isparitc Waban ki kiskeriten ia kir?
Claudie - Tekaci nama ni kiskeriten nin. Nama tapwe wi pameritcikew. Nama mitowi wir Marilou e kiskerimaiikw tan e icinakonik omikiwamik acitc tan e ici pimatisitcik ki kiskeritenano memantcic tan e iciwepasitc. Tan e ici arimiparitc. Aric Waban tekaci nam kiskeritakosiw!
Coord - Kecpin wi nosanetaiekwe ka wi totamekw, arimatc nicw awik ki ka wicamawawok kitci witcihitakok arimatc kaie wipatc. Aci wesa kekatc ka wi matcaiekw aci nama ki ka tapi ickwa aikanawaw. Matci ki ka witcihitinawaw kitci miskawekw ke witcihikoiekw.
Claudie - Ki micta pe miro witcihinan. Pitoc tapwe kata isparin aka aniki kitci taciketcik Marilou acitc Waban.
Coord - Aiarimotamatokw minawatc pe witamacikw.
Claudie-Rodrigue - Mikwetc.

Claudie kirika Rodrigue wircikewaw

Claudie - Kecpin ponitaiekwe micta mitcet a ocki pimatisitcik ki ka cikeritamihananowok.
Rodrigue - Anihe ka micta cikeritaman, ka kicowahikoian sa kotc kirano tca minawatc ki ka kicowatasonano kirano acitc kitci witamakeiikw.
Claudie - Arimatc otcitakotc ki ka aimihanano Waban.
Rodrigue - Ekoci kir aimihi, nin aric e ici wapataman nama ci ki ka ki tapwetwano. Aniheriw ka ki pe totatok ka tcipakweiikw spakatci. Tekaci nama aci anihe nin ni wi wapaten. Mia sa aci tekaci e taci pakitik.
Claudie - Waban, ki micta kicwahin!!! Tekaci nama actepan anihe kitci pe totowiak!
Rodrigue - Pitoc kitci iti iteritamekw cowatc kitci iterimoekw. Ma ki wi petenawaw ka ki iciwepasian otakocik ka ickwa mitcisoiikw?
Claudie - Kekwan kotc?

Rodrigue acitc ka kiwockwepiritci.

Rodrigue - Ka iti takocinian nimikiwamik. Nte ni ki ici pimotan actasonikiwamicikicik ka ici takok. Nicw tca ockinikiwok acitc nicw ickwecak taci masinacteciniwok. Ni petowawok e taci papitcik. Ka tca iti pecowapamakik peikw anaha ockinikiw ni pe tepwatikw. Enko na Micta Max ka ki ponitaspan e kiskinohamasotc awositakwakok.
Max - « Aie ! Ki kackitan ia kir kitci otapinaman ohwe, kitci minikweiin napier ?»
ni pe itinamakw onapierim. Orina kaie micta icinakosiw.
Une fille - « Ockinikicic ka micta sapitowatc otcotcoma? Enko a na.» Ah! Ah! Ah!
Rodrigue - Nama. Nama ni saperiten nin anotc.
L'autre fille- «Ockinikicic ka sapitowatc otatama!» You!hou!hou !
Micta papikasowok mia sa ko kia kiwockwatisitcik..
Max - «Esko pa tacikaman ka wi nta pamipariekw tekaci nama ki pe okwimesimian nama ki wi pamerimawok aniki aka ka wi matcewiratcik!» »
Rodrigue - Nama kirake nte icinakon ka itein.
Max - « Kekwan tca wetci aka kirakec witcimikwemiak kirakec?» »
Irin tca kotc e pe micta sitekinak ni kapotawaniw e tca micta pecowamitc e pe aimihitc : «hanhanhanhan?» Pe arikasikaso aric ni kiskerimatai ni tapwe ni niheriw ka pe totak.
Rodrigue - Ki ka witamatin, kecpin wi mimikweiane nin ni ka oreriten nama awik ni ka pe oreritamakw.
Max - Kecpin aka wi minikweine kirakec ma ki ta ki pe mirinan coria. Ki micta ocoriaminawatake aci kirawaw irikik aci e pa mawotci coriakeiekw. Ni noteparinan mackikicic kitci ki pa mireritamak.
Nama aric orina ni ki otci arimihikok kitci kackihoan aci meka misawatc orina icinakosipanak.
Rodrigue - « Ekoci pa mireritamokw»
Aci nta minawatc kaskina wiec pe aitewok :
Max - «Ki kiskerimititan ni misawatc e itatisiin.»
Nama wirawatc moci warowik nit aitatan wetci pe iciwepanakik napier pweteiapiskoriw e pe matikonihitcik mia tca nictikwanik e ici pe tawihitcik.
Max - « Ki ka wecihitin nin. Ki ka tca micta miro pamiparin. »
Ekoni e ici kiweparohoan e tca itohok. Micta kinowaskosiw nama aric ni koctaw. Ki tca iti kiskeritam nama nac ki otci iti kito. Ni ki aric peikon wepitaparihon kitci matcekapowian.

Claudie e masinahamowatc Waban

Kwei Waban,
E kiskeritamak aka e wi wapamiak acitc aka e miroparik kitci aimihitak. Anotc ni ki iteriten kitci motci masinahamatan.
Nama ki nisitotatin aci tan e itatisiin! Kecpin aci aka e saperitaman ka wi nta pamipariwok kirakec ki ta ki pe witamowinan. E totaman tca anotc ekoni kotc aka e ici pamerimiak nama wirawatc ki wi aimihawok aniki ka micta tapwerimiskipanak, Marilou kaie wir e ki matcatc, aric ma kirake wir ni ki pe witamakonan epwamoci tca matcatc acitc e ki pe witcihiwetc peikon, ki itotiskew wir ka ki ici aritisospan ke ititosketc.
E micta tca sokeritamokopan ka wi totamokopan tapickotc. Aci ka wi otamirotaiikw aci nta nama ki otci pameriminan pitoc ki ici mamitoneriten. Acitc tca nit ititakanan mictahi kit arimihikon matci mackiki. Tapwe kir ni anihe ki pimatisiwin. Aric peikon ki ka witamatin e ici wapamitan e totam acitc tan e ici takickakotcik ka pecowamapatcik. Ki micta mitcetiwok awiniki ka ki tapwerimitok. Ni ka kiraskin kecpin iteine nama ki kicowahin. Ni micta aric cikeriten.
Awik aka ka nisitotak e ispariin,
Claudie

Tan niheriw tca kirawe ke ki totakik :
1- Kata pe kiwe nta witcihiwew Waban ekota minawatc ke kiwe otamirotatcik.
Wirata memantcic kata onitawok irikik e aitetatcik.
2- Claudie kirika Rodrigue nama kata tipi ickwa aikamokw ka ki wi ici otamirotcik
3- Claudie kirika Rodrigue kata miskowewok kotakahi awiriwa kitci tapickowaritci
Marilou acitc Waban.
4- Kata nosanetin peikon ka ki ici otamironaniwok aric kata noteparin coria.
Kata micta saperitakoniw ke nta pamiparitci aric nama apitci kata saperitakoniw ke ki icinakonikipan.

Waban e natawapamatc ka witcihiweritci aicerimowinik.

Intervenant - Kekwan ka pe iciwirikoin ota?
Waban - Nit arimihikon matci mackiki
Int - Tante ka ki totaman wetci pa aitatain neta?
Waban - Ni apitc ka kitciparik ka weritaiak kitci nta pamipariak. Ni ki micta mireritetai epitc ki mireritaman kaskina kekocic ni wi kotcitatai. Ni ki tca iteriten enko potc anihe matci mackiki ke ki kotcitaian. Wirata arinc ni ki iteritetai aka kitci osamihitisoian.
Int - Tan tca e ici wapatamopan?
Waban - Tepirak ni wi kotcitatai kitci kiskeritaman tan e isparinaniwok atita matci mackikia minawatc ni wi ponitatai. Ni ki iteritetai nama ni wiec anihe totamane.
Int. - Kiapatc ia tca kit iteriten nama ni wiec?
Waban - Nama. Micta matci totakemakan matci mackiki.
Int - Kekwan tca?
Waban - Osam nama ni ki otci ekwamicten. Nirctam micta mirwacin micta mireritakon. Aniha kirika mackikicic, ni ki micta witcihikon e mamitoneritaman. Ni ka tca iteriten nama ni wiec kiapatc otapinake.
Nac ni ki iti osamikwaw.
Nama ni ki otci wi wapaten e iti micta okohikoan e iti nespitciparian. Ni ki iteritetai nama ni wiec ni ka kackitan kitci ponitaian tecikotc. Nama ni wapamitisotai e iti micta osamikok.
Int - Neta ka itaitain, tan tca e iteritamopan e ispariin?
Waban - Tatwaw e ickwa totaman micta kinec ko ni taciketai cowatc kitci iti iterimoian minawatc. Nac ni ki kiskeriten e arimihikoian e mamitoneritaman. Nama aci awik ni wi saperimatai acitc nama kekocic ni wi saperitetai pimatisiwinik itekera. Ekota tca ka wapataman e arimak kitci ponitaian.

Kit iteriten ia kir kata ki kackitapaniw Waban aka ni kitci icinakositc anotc ka icinakositc?

Ehe Nama Ehe
Aka kitci onipatamasotc e ici kiskeritek aka kekociciriw e apatcitatc acitc mekwata e apitcitatc matci mackikiriw. Nama kata kiskeritam tan e iciwepahikemakak matci mackiki epawmoci kotcitawaketc. Epwamoci tapwetowatc Victora ka wi nanto coriakatisoritci e ataweritci matci mackikiriw kata ki nanto kiskeritamopan awocamec tan e iciwepahikemakaki matci mackikiwa.

Int - Tan tca ke ki totaman kitci witcihitan?
Waban - Kitci witcihiin kitci kackitaian kitci ponitaian. Wirata nta kackitan nircike kitci ponitaian micta aric ariman. Anaha ko ka pe atamitc nama ni wi ici ponihikw aspinikotc ni pe natawapamikw.
Int - Tan tca ki tapwerimin ia kitci witcihitan? Kitci ki witcihitan patama kaie kir tapwe kitci kackitaiin tapwe tca kaskina kitci witamoin e iterimoin.
Waban - Ehe, ni nisitoten.
Int - Namiew ni ka iteian kitci pe witamoin kekocic kitci mireritamohiin kekotc ma kekocic kitci pe iciin kekocic kitci iti naherimitan.
Waban - OK

Claudie kirika Rodrigue oreritamokw : kitci nosanetatcik kekotc kitci ponitatcik ka ici weritatcik?

Rodrigue - Arimatc aci ki ka oreritenano. Kecpin wi nosanetaikwe otcitakotc arimatc ki ka miskowananowok kotakahik awiik ke tapickowatcik aniheriw ka ki ponitaritci. Epwamoci aka kitci taperimikoiikw.
Claudie - Ni witen anotc aci nama tapwe ni saperiten. Mictahi ki raciparin ni ka ki itwan. Nama ni wi wapatamowatai Waban ka ici arimiparitc !
Rodrigue - Kaie nin, kekatc ni ki ataweritcikan aric e ki micta mitcetitcik ka ki tapwerimitokok.
Claudie - Ni kiskeriten, nama aric wirawaw otci tepirak ki ka ki totenano kekocic. Aka kitci iteritamokw apicacin ni ka taci weritaiikw. Micta micaw ni nama ki ka ki iteritenano aci ni ickwa aikatenan minawatc tca kitci iteiikw ekote, matcacikw! Arimatc kaskina awik wir tipirawe tapwe otcitakotc kitci saperitak aniheriw ka taci aitotak.
Rodrigue - Kecpin tapwe e witaman, kecpin natotatisoane, tecikotc kaskina ni ta ponitan. Nama ni sakitan kekocic e ponitaian kekocic e kitciparian; e metowaniwok ekote wetci natcipatakaniwok kekocic kitci mackawerimonaniwok. Kecpin tca nircike ni ta ponitan aric kotakahik e mamitonerimakik kirawe ni saperiten acitc e mikawian kitcikami acitc ka ici aitakoki nete ni micta wi wapaten.
Claudie - Paris, micta mikiwama… Kiapatc anihe ni micta matcikoweriten kaie nin. Tapwe kata ariman kitci kiwe otamirotaiikw kitci miroparik. Kitci kackitaiikw kitci miroparihitoiikw e mamo otamiroiikw.
Rodrigue - Anihe e arimotaman kitci mamowi otamiroiikw. E ici wapataman nin e aitaikopan mictahi aci nama sapiparinopan.
Claudie - Tapwe. Anihe aric ka wi iteian, Patama ki ka kotcitanano tapickotc kitci mamowinitowok e otamirotaiikw kekocic. Kecpin ni kiapatc ni aiciwepasiwokwe nama aci kata miroparin ka wi matcaiikw.
Rodrigue - Aka tca osam micta micatatan ke ici arimihikoiikw. E momowinitonaniwok kitci otamironaniwok patam mickaweritcikatew acitc witcihitonaniwon. Acitc tca, nama ni ki koski kitciparinano micta nipara aci ki ickwa matcekenano kata wapatamok aniki ke pe ocki positcik ka ki ici otamiroiikw. Acitc nipara aci kiskeritcikatew kekwan ka taci otamirotaiikw. Aniki ke pe positcik kata kiskeritamok ni kekwariw ka nataweritamok ke ici otamirotcik.
Claudie - Arimatc meka tca ki ka wicakemonano. Ki ka kokwetcimikowinano kekwariw wetci aka aci taciketcik aniki kotakahik.
Rodrigue - Nama arimatc ki ka witenano. Ki matcawok kirano tca arimatc kata tawok ke witcihitok kitci tapickowatcik, ekoni kotc. Kecpin tca awocamec wi nanto kiskeritakawe wirawaw tipirawe kata nta kowetcimewok.
Claudie - Kata ni kiskeritamok kekwariw wetci aka aci tacikeritci.
Rodrigue - Nama wiec ki ka ki totenano. Namiew kirano ka totamokw.
Claudie - Ekote meka tca, ki ka ocitano mawotcihitowin kitci wicakemoiikw kitci miskawikok nicw kotakahik awiik.
Rodrigue - Tepirak ia tca anihe otci kitci ocitaiikw mawotcihitowin? Matc meka ni tepirak ki ka ki ocitano masinahikan e tipatcimoiikw kitci akwaskahamokw.
Claudie - Tipatcimo masinahikan, nama ni apitc kata saperitcikatew.
Aie! Aci ni kiskeriten : ki ka ocitanano mawotcihitowin kitci witamokw nicw e nantonowikok awiik kitci masinahamokw wewerita ke itotisketcik. Aniki tca kotc ke saperitakik kata masinahotisowok ekota tca ke otci oramawikok. Mitowi ko e okimakaniwok, kecpin pe mitcetiwate nama tca kirano tipirawe ki ka oramananowok. Tan tca e iteritaman?
Rodrigue - Tapwe sa nahinakon. Kecpin tekaci aka awik wi masinahotisote?
Claudie - Aci nta! Tekaci aka awik tate ke wi tapickaketc, nama potc saperitamotakenak ka taci weritaiikw ke ma potc micta awacikasotakenak. Nama tca wi pasikowok kitci naskawatakik kitci otamirotatcik.
Rodrigue - Hé! Hé! Hé! Mitowihik Waban! Aric meka tca ki ka micta wi kokwe cakosiikemonano kitci saperitakik kitci pe witcihiwetcik. Matci ketcinatc anaha ka tiperitak awaciwikiwamiriw ki ka ki witcihikono.
Claudie - Tapwe kotc. Ni nahinen ni anihe.
Minawatc Waban, otci kekotc ni taci arimeritamihikon kiapatc. Aci tca micta weckatc e ki ici mamitoneritamospan ohweriw. Kiskeritamokopan potc tapwe e micta micarik ke ici otamironaniwok. Tapwe ko micta micariw ka ici mamitoneritak nama aric ki ka ki itanano kitimiw ni… Mia sa kekociciriw e ki takickakotc e ki natawapitikok nac aka ki otci iti saperitak.
Rodrigue - Ki kiskeriten ia, anihe matci mackiki micta ni nipara anihe ki onatcipikitikon. Enkweriw ni ketcinatc ka ki micta osamipitikotc. Misawatc e micta kice mirwacik e ici mamitoneritaman, e micta miro otamiroin, micta keskatc matci takon kekocic ke pinawepahikoiin aka tca wirawatc kitci kiskeritaman anihe e ispariin.

Marilou chez l’intervenante

Intervenante - Kwei Marilou!
Marilou - Kwei.
Int - Ka tiperitak kiskinohamatokamikoriw ka pe iciticohiskw kitci natawapamiin?
Marilou - Ehe. Ni ki pe itikw matca natawapami anaha koctam kitci wapamitc e ponitawak.
Int - Tan tca e iterimoiin neta? Kit iteriten ia ni ki micta cikimikoiin kitci pe natawapamiin?
Marilou - Nit iteriten, arimatc aci otcitakotc. Kirika aric nama wiec nit iteriten.
Int - Euh… Ni wi nisitoten kirawe… E ici nisitotatan nama ki ta ki otci pe natawapamin kecpin kircike, aric kit itwan aci misawatc ota e pa tacikeian aci misawatc ota e pa tacikeiin nama wiec kit iteriten kitci aimihitoiikw. Ekote ia?
Marilou - Ehe. Ekote.
Int - Ekote meka tca. Witamaci kekwariw ka arimeritak ka tiperitak kiskinohamatokamikoriw kir otci. Kekwariw wetci iteritak ki ka ponitan e kiskinohamasoiin?

Aiatisokwe Marilou e ici arimiparitc opimatisiwinik acitc e arimihikotc matci mackikiriw. Nac iti arimotamok owitcicanik itekera e ici arimiparitcik.
Marilou - Nikotin ni ta micta mireriten kaskina tapickotc kitci apiak kitci aiarimotamak e ici arimihiwemakak e ici pikotasomakak tapickotc kaskina e witcicanitoiak. Kitci kiskeritakik tan tca e iterimoian nin neta. Aka kekocic kitci katakaniwok.
Int - Kecpin tca witamotenak kinikihikok anihe kaskina ka pe ici witamoin kitci witamowitcik tan e iterimoin aniheriw e otapinakik matci mackikiriw?
Marilou - Aci ni ki ickwa kotcitan. Tatwaw e arimotaman tecikotc micta kiciwasiw notawi. Tecikotc tca e itetc nama awik kata witamako ke ici pimatisitc. E itetc tca kirika kiskinohamatokamikok ki otcitan anihe ka itein.
Int - Kikawi tca wir?
Marilou - Kaie wir meka ni otapinam matci mackikiriw. Itekew ni aniheriw pekaterimowakew. Nit iteriten aric ni e wapamak tepirak ni aka kitci kiciwatasotc aka ki wapamatc notawia e kiciwasiritci ekoni kaie wir wetci totak aniheriw. Ka keskinawapamatc e otapinamiritci matci mackikiriw.
Int - Kit iteriten ia ni ki ta pe witcewikok e pa natawapamiin?
Marilou - Nama ni kiskeriten. Ni nta micta kockoparin.
Int - Anaha tca kictes kata pe icpan ia?
Marilou - Nama ni kiskeriten.
Int - Taw ia kotak awik kiwitcicanik itekera ke ki aimihatc?
Marilou - Wirata noko, nama aric wiec kaie wir ki totam.
Int - Aka e takok e kiskinohamakaniwok, kecpin e osaminakosinaniwok kimikiwamiwak matci ia ki nta tacikan kikokomik?
Marilou - Matci ni ta aiarimotamowaw. Kecpin aric matcaiane wircike kata tacikew anohwe nicim ka ickweciwitc.
Int - Ki wi nanakatcihaw.
Marilou - Ehe.
Int - Kecpin aric kaie kir e otapinaman matci mackiki nama awocamec ki witcihaw.
Marilou - Nama. Aric ma kirake nama wircike tacikew nama tca apitc koctatcik.
Int - Ki ia ni witamakw?
Marilou - Nama, ni kiskeriten ekoni kaie nin ka ki isparian ka awacian ekoni e iterimoiapan.
Int - Kotci aimihi peikon kikokom. Kwecan takonitake ke ki ici witcihisk ke ki ici witamask.
Marilou - Matci meka ni anihe ni ka ki toten, aric ma kaie wir noko akosiw ni. Nama ni mocak omikiwamik tacikew nanikotin nete nitosik nta aitacikew.