4. Tante ke icaniwok ?

Ki orictawok irakonikewiniw kitci miroparinik e otamirotcik. Aci tca nta kitcipariwok kitci weritatcik ka wi nta pamiparitcik ockinikiwok. Patama tca witamowakaniwok mamitoneritakik aka ka ki otci ici kanawapatakik atita kekociriw.

	Awin tca anotc ke masinahiketc?
Rodrigue -	Nin, Ni ka toten.
Marilou -	Kir, Waban, ka oreritaman sa nictam kitci pamatisinaniwok. Takonopan ia wiec e ki oreritamopan kitci icain.
Waban -	Micta mitcenopan: nanikotin au Mexique , Minawatc Alaska itekera. Minawatc kiapatc Europe itekera kotak kaie kiapatc Inde. Anotc tca mekwata nama moci kekocic ni ki otci oreriten.
Claudie -	Nin, Nete nte mireriten micta otenawa kitci pa wapataman; New York, Paris, San Fransisco, Pékin.
Rodrigue -	Tekaci ia kitci pa wapataman e irikokoskamikak aski ka wi totaman
Marilou -	Nin, Neta Maroc ni ta mireriten kitci icaian.Ni ki wapamawok masinasowinak. Peikw nitcirowemakan ka ickweciwitc witacikemew iriniwa ekote wetciritci.
Claudie -	Matci ki ta ki kokwetcimano kekwariw ka wi nanto kiskeritamokw tan e icinakonik ka ici taciketc.
Marilou -	Nama ni ota tacikewok. Nama wiskatc tapwe ni wapamitonan.
Waban -	Nin, Nete nta mireriten kitci icaian Amérique latine, aniki kitci wapamakik Incas kekotc Mayas. Tekaci ketcinatc kaie wirawaw pitoc ici pimatisitakenak kaskina anihweriw otatisokaniwaw, e ici pimatisitcik. Enko ni kirika ki ta masinahenano e weritaiikw ke pa matisiwok. Kaskina ko anihwe atisokan, e itotisketcik kaie wirawaw,acitc tan e ici pimatisitcik kaie wirawaw.Kirawe kitci kiskeritamokw kekwan ka wi nta wawapatamokw.
Rodrigue -	Nin, nete ni wi ican Californie anihwe kitcikami kitci wapataman acitc ko e micta mitcahak kitci pa kapacimoian acitc mitowi ko cocokwesam nipik ka posinaniwok. Pshshshsh !!!
Waban -	Kekwan tca aka nete Australie? Ni ki wapaten e arimotcikatek. Takon nete micta micak tepirak e rekawok acitc kitcikami acitc aniki ko pitahocesiw ka icinikatakaniwitcik. E micta mirwacik kitci kapecinaniwok piskeskina. Micta otenawa e micta mirwaciki kitci pa kiwotaniwok.Peikon kaie ka ici nta kapacimonaniwok e micta mirowinakok.
Marilou -	Owe. Tan tca ke totamokw kitci oreritamokw. Kaskina tca e micta saperitakokw.

Waban -	Kaskina ki ka masinahenano pwetecik kitci actaiikw minawatc tca kitci otapinikeiikw anihwe tca kotc ke pe orowiparik.
Rodrigue-	Tepirak kata peikociw ke mireritak anaha ka ki masinahak ite wa icatc aniki tca kotakahik nama kata mireritamok.
Claudie -	Arimatc ni ki ka masinahenano kekwan ke nosanetaiikw aka kitci onipariikw. Atcikotc tepirak ki ka taci tetipaparinano.
Marilou -	Takon ia tca ni kotakahi wiec ke ki natawapatamokw kirawe e saperitakok ?
Claudie -	Nama nikan ki ka ki kiskeritenano.Kaskina meka micta saperitakonotake.
Marilou -	Anihwe meka ni ka wi iteian takonotake kirawe ka saperitakok kitci icaiikw. Kirawe ka takonokwe ke ki aitotiskeiikw ?
Waban -	Kirawe ia tca wetanotake kitci icaiikw nete.
Claudie -	Kaskina meka ni matci ki ka ki icanano.
Waban -	Aric takonotake tapwe wiec…kirawe kinec e miparinaniwok. Matci potc kirawe warowik e icaniwok kata micta mitcen kekocic ke wapatcikatek kekotc ma aka kinec e miparinaniwok kata micta mitceno ke wawapatcikatek.
Marilou -	Nete Maroc, emitikocimonaniwon ni.
Rodrigue -	Witcihiwemakan ni.
Claudie -	Nete kaie France emitikocimonaniwon ni. Peikon kaie Belgique, Suisse, acitc Afrique.
Rodrigue -	Kekwan aka wetci kokwetcimokw kiskinohamake iriniw anihweriw ka micta nahikiskeritak e aicinakok wiec kotakahi otenawa. Emitikocic sa wir anaha. Ki ni kaie micta pa matisiw wir. Micta nipara ki ka ki witcihikono.
Claudie -	Nama tca potc kiapatc anotc ki ka oreritenano tante ke icaikw.
Waban -	Ekoni marotc kiapatc memacic ke ici pehoiikw kekwan ki ka witcihikonano. Tan tca kirika ke pe ici wawitamakoiikw.
Marilou -	Matci ma ni kiapatc ki ka ki aiarimotenano peikon pe icate tca micta nipara aci kirawe ki ka kiskeritenano nipara meka aci ki ka ickwa aiarimotenano.

Ka kiskinihamaketc e nakickowakaniwitc

Tan e icinakok ka wi pamatisinaniwok

Prof -	Ki kokweteritenawaw ia tante ke icaiekw? Aci ia tca mematcic ki kiskeritenawaw tante ke icaiekw.
Waban -	Mexique, Alaska, Australie, micta otenak, Maroc, France. Nama aci ni kiskeritenan.
Prof -	Kekwan ni towi ka wi totamekw e pa matisiekw.
Marilou -	Kitci ma mipariak nte wiec. Mani peikon anihwe ekoni e icinikatek. Ma ia?

Prof -	Papitoc meka ni matci icinakon anihwe towi e pa matisinaniwok.Kecpin takonokwen kekotc kiskeritamekwen kekwan mi aka win ta totamekw takon meka ni kaie tepirak e nta witcihiweianiwok nete ka ici kitimakisinaniwok. Micta tca ko tapwe micaw anihwe e ici otamirotakaniwok kitci nta witcihiwewaniwok.
Claudie -	Ni ka ki itanan nama nte ni ki otci ici mamitoneritenan.
Prof -	Kekotc ma wiec nte kit icanawaw tepirak peikonok kekocic kitci tacikamekw irikik ke pa itanohoekw. Mitowi tepirak kitci pa kapacimoekw. Matci kaie kitci pa wawapatamekw waska kekwan ka aitakoki. E icinikatek ko anihwe towi ka pa kiwotaniwok e pa wawapatcikaterik kekwariw wirawa ka itotisketcik. Tan e aicinakonik otacikewiniwaw.
Waban -	Wirata ni ki iteritetan kaskina wiec kitci pa icaikw neta kotc otenak ke ici takociniak. Kekocic nte kitci pa aitotiskeiak.
Prof -	Ka kirawe ia tca kitci pa kiwoteiekw enko a ni ka wi totamekw. Eko ma tca ni e icinikatcikatek kitci pa 'kiwotaniwok'.
Marilou -	Ehe, ehe, enko ni ka wi totamak kitci kiwoteiak.
Tous -	Ah ! Ah ! Ah !
Prof -	Hé! Ekote ma tca, Marilou, aci kirawe iti kiskeritakon.
Waban -	Kecpin tca kirika pa nanto kiskeritcikatek tan e ici pimatisinaniwok acitc e itatisokasonaniwok ite mia ke pa aicaniwok.

Kekwan ke kanawapatcikatek ite ke icariwok

Prof -	Tan irikik ke taciekw?
Rodrigue -	Wiec mitato acitc niaran potc ke awocamec.
Prof -	Wiec e icaniwok e mitcetinaniwok arimatc wesa micta miro werinaniwon. Kaskina awik kitci naherimotc e pa matisitc kaskina kitci kanawapatcikatek anihwe kekwan ke ici mireritamihakaniwitcik ke pa matisitcik. Tan ni irikik ke aitanohoekw.
Waban -	Nta mireriten wiec nicto manactakana kitci itanahoiak.
Prof -	Pitcerika ia ki ka pa matisinawaw?
Marilou -	Ehe.
Prof -	Kaskina wiec micta mireritakon e pa aicaniwok. Aric nictam wiec e icaniwok karike tca e mitcetinaniwok takon ni atita kitci otenawa aka orina e micta arimak e icaniwok.
Rodrigue -	Enko meka tca anihwe towi ka wi nanto kiskeritamak. Kekwan tca wetci takok kirawe aka tapwe e arimak e pa aicaniwok.
Prof -	Mitowi... Ka posiin nte e icaiin kekotc ma e asitcak matci kata takon kirawe kinec e miparinaniwok ite wa icaniwok. Ote itekera kirano ka ici tacikewok napitc kiwetinok. Micta pitcaw tapwe wiec e pa aicaniwok micta meka micaw e irikoskamikak. Minawatc nete Europe micta papeconakono ni nte otenawa.
Waban -	Ah! Atama ka itititapan.
Prof -	Kirika tca, kecpin icaiekwe nte ka ici micta ko icaniwok, ka ici mitcetinaniwok matci potc kirawe kata wetikitakosiw karo ke mipariakeiekw.
Rodrigue -	Tan irikik wiec?
Prof -	Mitowi... ota wetci matcepariekw nete e icaiekw Autralie awocamec nictwaw kekotc newaw kata misikitakosiw. Patok nte e icaian Europe.
	...
Kaskina -	Wow !
Claudie -	Kir sa, ekote ia e pe otciin France?
Prof -	Ehe.
Claudie -	Ki kiwan ia ko nanikotin ?
Prof -	Ehe. Tatwaw e ickwaw nicto piponikak nit ican. Anotc ohwe ke pe pipok ni ka ican minawatc.
Marilou -	Matci tca ki ta ki witcewotinan!
Prof -	Ah! Nama ni ki otci ici mamitoneriten nte.
Rodrigue -	Enko ia tca, tan ke itakitakositcik karo kamiremakak e posinaniwok…
Claudie -	Ke asitcak ke icaniwok.
Waban -	Kekwan ke posinaniwok.

Kekwan wetci nta pamiparinaniwok

Takon aric kirawe ke kictapatak ke kanawapatcitek: Kekwan wetci wi pa matisiekw ? Kekwan ka micta otcipitikoekw wetci wi matcepariekw?

Rodrigue -	Micta mitcet kekocic kitci pa wapatamak.
Waban -	Mitcet awik kitci pa wapamakitc, kitci kiskeritamakitc tan wirawaw e ici pimatisitcik. Kekotc ma tepirak kitci pamipariak tepirak.
Prof -	Micta kice kictapan anihwe ka witaman. Waban. Kitci ki miroparik wiec e wi icaniwok arimatc ni nta nakickowakaniwok kotakahik awiik misawatc notc e osameritcikatek ni e pa aitotcikatek. Kecpin kaie neta mi aka wi pa aicaniwok pitoc e ici pimatisinaniwok. Ekota kaie witci kiskeritcikatek tan e ici pa matisinaniwok. Mitowi;.. takon ni wiec otenawa aniki tca ickwecak arimatc mocak wikwewikictikwanewok. Micta mitceno ni kekocicca ke wawapatcikateki kotakahi otenawa.
Marilou -	Hein ! Kekwan tca?
Prof -	Ekoni kaie wirawaw e ici pimatisitcik.
Claudie -	Nama nte ni wi ican.
Prof -	Ekwa! Namiew anihwe ke otci aka icaiin, aric arimatc ki ka kiskeritenawaw ekoni e icinakok. Peikon kaie kitci kiskeritamekw tan e ici mitcisonaniwok. Papitoc meka ni kaie ici mitcisonaniwon.takon atita otenawaw ka micta wisikaskisonaniwonik ka mitcikik. Kekotc ma ka kitikaniwonik aka kirano ota ka nitawikik wirawaw aitakoniw nete. Enko ni anihwe ka nikickatek e pa matisinaniwok.
Waban -	Nete France, tan e aici mitcisonaniwok.
Prof -	E icinakok mitcim mitowi ni ota kekatc ka icinakok ka mitciwok. Tapwe micta wikicin ka mitcinaniwok. Nama taw nete poutine ka icinikatakaniwitc!!! Ki kiskeritenawaw ia enko ni anihwe ka micta mawotci kiwotaniwok kaskina e irikiskomikak?
Kaskina -	Nama.
Claudie -	Kekwan wetci micta icaniwok ?
Prof -	Osam e micta mirowinakok kaskina wiec. Kirika e micta mitcek kekocic ke pa wawapatcikatek. Otenawa, matanawa acitc kitcikami. Kirika tca potc e micta wetak e icaniwok peikon kaie kitci miskatek ke ici tacikaniwok. Emitikocimonaniwon kirika. Anihwe kaie Paris e micta kice micak kaskina kekwan neta takon neta.●.

Rodrigue -	Kecpin tca enko anihwe orapatamoikwe nama kata takon aci ke arimeritamihikoikw. Kaskina kekocic neta e takok acitc wetan kekwan ke posinaniwok acitc nama orina micta warowik ki ka miro nisitotenano emitikocimonaniwon meka. Kecpin tca pe witcewiwake ki ka tca pa witamowinan micta nipara kekocic Enko anihwe nin ka orapitaman.
Marilou -	Kaie nin.
Waban -	Ehe, enko ni.

Prof -	Ekote meka tca. Minawatc tca kitci ki miroparik arimatc nama ki ka kiweritenawaw. Kecpin minawatc meckotcitaiekwe nama nac ki ka ickwa aikanawaw.
Claudie -	Ekote ma tca.
	(Waban iteritam : « Aci erowek iti icinakon ka micta nataweritamapan. France! Ah! Micta nipara kekocic ni ka natcipatan. E micta tca mitcek neta atisokanik itekera acitc e ici pimatisinaniwok. »

Victor cikimew kitci otapinamiritci Waban

Victor -Kwei, Waban ! Tan tca aci mekwata ka taci otamirotain?

Waban -Aci sa wirata taci nahiparin. Ni ki tca aci kiskeritenan aka kir kitci pa tacikein. Kit ca pe witaman kirake.

Victor -	Tapwe, kirawe ki witaman. Tecikotc aric ni ki nisitoten osam ni kecpin ki tacikeian neta. Osam mekwata micta mitceno ka aitotiskeian. Tan tca mekwata e aisparik ka taci otamirotaiekw.
Waban -	Aci kirawe ni kiskeritenan ke aitotamak. Aci kirawe iti saperitakon.

Victor -	Ki ta meka tca mireritamihitison. Ki takon minawatc nin micta miro kekocic.ka micta miroparitc ka sakoswakaniwok. Teka apitc aci kir ka ki kotcihatc ka micta miroparitc. Tapwe tca ka miroparitc 100% ka itwaniwok. Ka kitcitawakaniwok ni naha towi.
Waban -	Patama tca aka kitci kiskeritakik aniki kotakahik ka witci otamiromiskik. Nit iteriten orina kata matciparin kiskeritakoke.
Victor -	Nama aric kaie wirawa kata oretamokw tan ke aitotaman irikik e peiko kicikak. Nama ni kit ititin ekoni nespitc ke totaman aric ma peikwaw kitci kotcitakein. Kir otci tepirak. Nama kaie ki ka ki pe icin ekoni kitci natawaparik e wi pamiparian kecpin kotcitakeine.
Waban -	Ni ka mamitoneriten.
Victor -	Akawir osam kinec mamitonerita tekaci sa nama kinec e matceparitc.
Waban -	Tan e totaman kaskina anaha kitci tatc? Mani ki koctatcin nikotin kitci makonikoin?
Victor -	Tawok meka ni nin ka micta miro kiskerimakik. Kecpin ni isparike tawok patama ke makonakaniwitcik epwamoci nin. Ni ka tca tepiratan kitci ocimohitisoan aipitc.

Kekwariw kit iteriten ka micta saperitak Victor opimatisiwinik?

Matci mackikiriw
Okwimesa
Coriariw

Wetakocinik aci icaw Waban nete Victor omikiwamirik

Victor -	Ki micta iti nahiparihitisowakan kaie kir anaha towi. Kecpin mekwat e otapinatc eko meka ni ntwatc e ici otapinak aka kitci nanakasian. E iteritaman aci misawatc. Tekaci wewerita kitci kiskerimak tan e isparitc. Tan e iciwepohowetc.
Waban -	Oh! Ekwa. Pekatc ni nit aitoten nama ni ni wi osamikwaw. Tepirak ni nanikotin. Mitowi ka iciin ka kotcitawakaniwok tepirak. Kirake peikwaw.

Victor -	Nanikotin ke ma kotc peikwaw anihwe ka kictapatak kitci ni tatc kotc e wi sakoswakein. Tan ke icinikosiin kecpin aka tatc kikwimes Victor, wa?
Waban -	Tapwe kecpin anihwe towi kir ke asperimototakoin.
Victor -	Ki ka ocitamatin peikw tapwe tca e miroparitc. Namiew arica. Tapwe ka miroparitc ka itwaniwok. Oma kotcihi.
Waban -	Wow. Peikw tepirak ni kicikwaw, niciwok tca.
Victor -	Oh!Oh! Pwapwahikaniwon nama tca kircike ki ka pa mireritecin.

Pe niciwok kotakahik ka pe takocinitcik.

E nicitcik -	Kwei Waban !
Waban -	Kwei, ockinikiwok!
Victor -	Ki ka miritinawaw kekocic kitci witcihikoekw e witcewek Waban.
E nicitcik -	Tan tca ici mireritam ia ni wir waban kitci witcewokitc? Aniheriw meka ni mekwata tacikam ka wi pamatisitcik. Wircike kirawe aitacikatiso.
Waban -	Kekwan tca wetci iteikw anihwe?
E nicitcik -	Arica meka ni tepirak.
Waban -	Arica mia, tca ni tapwe!
E nicitcik -	Ma sani..
Victor -	Ockinikicicak, nama wesani ki otci pe icaw ota Waban wiec kitci itakaniwitc. Ota ki pa aitacikanano kitci pe ni pekaterimoiikw. Oma, otapinakw.

Nanake wiskata

Waban -	Ouais ! Namiew ni naha pikiw. Tapwe ia tca ni tepirak ni ka sakoswakaniwok neta ka apitc.
Victor -	Memantcic ni takon neta kotak matci mickiki PCP ka icinikatek.
Waban -	PCP !!! Ki kiwockwatisin ia ni!nam awirawatc ki otci pe witamowin. Nama wiskatc ni ki otci itwan ni wi otapinaw anaha towi.
Victor -	Kecpin wi kotcitaine, ekote meka ni e icinakok. Cowatc ka ta icinakon kipimatisiwin. Ah! Ah! Ah!

Otcita ia ni kit iteriten kir aniheriw ka ki atawetc Victor e takonik neta matci mackikiriw PCP ka icinikaterik ?
1 Ehe, otcita osam aniki ka atawetcik nama ni kaie wirawaw kiskeritamokw kekwariw ka acterik neta matci mackikik.	2 Nama, aniki ka atamatcik Victora actawok ni aniheriw PCP kirawe kitci macikakotcik aniki ka otapinakik awocamec kitci sakitatcik..	3 Nicike potc anihe ka isparinik ka ki takok neta PCP matci mackikik. Aric wir, Victor kiskeritam ni kekwariw neta ka takonik kiskeritam wir tan e isparinik.

Nanake wiskata.

E nicitcik -	Eh! Victor, ma takon kekocic ka minikwaniwok ? Ni micta pasotonan.
Victor -	Matca natawapatamokw nete ka minikwaniwok maskomiwocik Cooler ka icinikatek.
E nicitcik -	Aaaah! Ka wikicicik ia ka takok. Ka ciwakamicik. Ekote meka tca.
Waban -	Mia sa anotc e manactakaniwok kirika tca mia e otakoci mari kicikak. Mia tca kirika pitoc wiec e pa tacikeian e iterimoan. Aie! Mia sa aka e nisitosian.

Victor -	Ki wi pa miparitai meka tca. Enko tca anihwe mekwata ka taci ispariin.