13. Aci kekatc ickwa aikaniwon

Aci ickwa orisinahamokw ite ke icatcik acitc tan ke aitotakik nta pamatisiwate. Pe nta nakickowew Waban e pe nta tipatcimotc kekociciriw. Minawatc wir marilou aci natcipariniw awocamec kitci wikokwe nisitotatisotc tan e iciwepasitc.

E mawotcihitotcik ka otamirotatcik : E ki oreritcikatek ke icaniwok

Claudie -	Rodrigue, Aci micta weckatc kir nama ki mitan e mawotcihitoikw. Esko ka kiskeritamokw kaie wirawaw matci kaie wirawaw ockinikicicak kitci mitatcik kaie wirawaw e arimwaniwonik. Kirctam tca wapatiriwe e ici kackitaiin.
Rodrigue -	Heuha ! Heuha ! Heuha ! OK, Ni ka meka tca mitan. Valentine, aka mato minawatc tca mawotcihitoikwe kirctam tca ki ka mitan.
Valentine -	Nin ia? Nama wiec ni ki otci itan, tepirak ni ki mamitoneriten nama kaie ni maton. Kirika tca nama ni ki otamirotan ite ke pa aicaiikw.

Rodrigue -

Aci meka tca anotc ki ka kictanano kitci kictaiikw tapwe tca ite ke icaiikw. Mikwetc nit itaw M. Berthelot, ka kiskinohamaketc e ki pe nta witcihitok e ki wawitamatok ite ke icaiikw. E ki witamatok ke apitc ma mia aicinakok ite ka wi pa icaiikw. Kirika tca ki wi witamatitaw Waban e ki pe witak e wi pe nta nakickakoiikw nakiska. Ki kiskeritenawaw wir nirctam ka ki mamitoneritakipan ohweriw kitci nta pamiparinaniwok. Wirctamiwaw ka ki kitciparitcik kirika Claudie. Ki tca iti kapapan osam e arimiparitc. Kecpin tca aka wiec iteritamekwe ki ka nakickowano anotc memacic.

Valentine -	Kekwariw ka wi arimotamakoiikw?
Rodrigue -	Nama ni kiskeriten.
Éric -	Nama wiec nin nit iteriten.
Valentine -	Kirawe patama kiskeritamok kekwariw ka wi arimotamakoiikw. Nama aric kaie nin nit iteriten.
Claudie -	Ni ka meka tca takapikenamowaw kitci witamowak kitci pe icatc.

Date	Endroit	Hébergement	Activités
Lundi… juin	Paris	Centre d'hébergement des jeunes	…
Mercredi… juin	Paris		…
… juillet	Versailles	Gîte ...	…
… juillet	Azay-le-Rideau ?		…
… juillet	Nantes		…
Lundi… juillet		...	…

E ickwa tca aimihakaniwitc Waban aci kaskina otamirowok : Akwaskohewok aski masinahikana France e aitaskamikarik. Masinahamok tca kaskina ite ka wi icatcik acitc tan apitc acitc ke aitotakik. Kaskina kotakeriw ka wi totakik. : Takociniwate Paris, Versailles, Micta mikiwamiriw nte itekera Loire ka icinikaterik…

Aci wiec peiko tipahikana taci otamirowok. Aci pe takociniriw Waban.

Waban -	Kwei.
Tous -	Kwei.
Rodrigue -	Ekoci weripi. Kaskina weripiwok. Waban kanawapamew aski masinahikana ka ki akwaskohakaniwiritci.
Waban -	Hé ! Mekwata ia ki micta werinawaw.
Rodrigue -	Ehe. Mia ni micta werinan.
Waban -	Mikwetc e naheritamekw kitci nakickotatikok. Nama ni kinowec. Ni ki iteriten kitci witamatikok kitci witamatikok kekwan wetci ki nakatitakok. Nirctam ka mamitoneritamapan ohwe kitci weritaian kitci nta pamiparian, nama ni mia ni kiskeritetai ite mia wa icaiapan. Tepirak kotc kitci nta pamiparian. Aric anihe ka ki micta miro kiskeritaman e wi matcaniwok nama ni tepirak e weritakaniwok ite ke icaniwok acitc kekwan ke totcikatek kitci mawotcicoriananiwok. Kirika ni awiniki ke natawapamakaniwitcik tan wirawaw e ici pimatisitcik. Nin e ici wapataman e nta pamiparinaniwok, nama ni mia e matceparinaniwok kitciparin tecikotc ni kotc e ickwa oreritaman e wi matcain. Aci nta ki kitciparin kitci nanto kiskeritaman ite wa icain tan e ici pimatisinaniwok e aitatisokasotcik kaie wirawaw. Acitc e aimihitonaniwok. Enko aka ka ki otci kackitaian kitci arimotamatikok. Tante mia ke aicaniwok, ke aistcak, kitci mawotci corianiwok kaskina anihe ka nanakatcitakaniwok ko e wi pa matisinaniwok. Enko anihe kirawe ka ki motemakak. Nac tca ni ki iti onicmikon. Nama ni ki otci kiskeriten ke aiteritaman. Ekota tca nac ka iti arimiparian kitci iti pakitinitakok.
	Partagez-vous l'idée que Waban se fait d'un voyage ou s'il complique trop les choses ?
Rodrigue -	Hum ! Euh… Waban, kit itwan nama ki otci kackitan kitci witamoiak. Tan kir e ici wapamopan. Nama tca ni ni mikawin kitci aimihiak.
Waban -	Ehe. Ni ki arimoten ni wirata nama aric tapi orina ki otci witamatinawaw. Kirika tca nama ni kaie nin kirawe ni kiskeritetai ni apitc anotc tca kirawe aci ni kiskeriten. Pwacta ni ki kiskeriten kekwan wetci ki aitotaman ka ki aitotaman. Kaie tca ka ki iti iteritamapan aka kitci miroparik kitci nta pamiparinaniwok. Aric anotc ki witamatinawaw e cikeritaman ni e ki iteritaman aka kitci miroparik. Kir Claudie, kaie kir Rodrigue. Aric anotc ni micta mireriten e wapataman aci kitci miroparik aka e ki otci ponitaiekw. Kirakec sa kaskina ke nta pamiparitcik kitci micta pa mireritakik. Kitci wapatakik kaskina tan e icinakonik pitoc wiec acitc kitci kiskeritakik tan e ici pimatisinaniwonik. Enko ni anihe ka wi witamatikokipan.
	Nama kitonaniwon.
Claudie -	Waban…Ni micta mireriten e ki pe icain ota. Tapwe ki arimanotake kitci pe natawapamiak kitci pe nta aimihiak. Nama ni nisitotetai kekwan wetci keskatc aka nokosiin. Tapwe notc ni ki kicowasin. Ki ki witamatitai ka masinahamatan. Tapwe tca ke itein ki arimotamatitaw memantcic, ni mikawin e ki arimotaman ninan tca potc aka e ki otci tapwe pamitamak kekocic e itein. Tapwe kirawe ni ki aitacikenan anihi ke aitotiskaniwok kitci ki matcaniwok. Kirawe kata ki miroparinopan awocamec kitci aimihitoikw.
Rodrigue -	Kaie ni ni micta mireriten e ki pe icain kitci pe witaman ka ki iciwepasiin. Aci tca nta kekwan tca kirawe ke ki totamokw. Tapwe nama ni ki otci tapi pamitenan ka wi iteipan aric anotc nin nama wiec nitatamerimitison awocamec. Awocamec ki ta ki aitoten kitci witamoiak ka wi witamopan. Anotc kekocic ia ni ki petan ninan otci kekotc ma…kekocic ki icinan…nama ni kiskeriten nin…
Waban -	Nama taw awik ke ki itactohorakaniwitc, nama kekocic ni petan nama kaie awik kekociciriw nit itaw anihe otci kaskina ka ki totaman. Aric nin, Ni kicteritetai kitci aimihitakok kitci witamatakok ka ki isparian acitc pitoc kaie nin kitci ici mamitoneritaman kotak kekocic aci kitci otamirotaian. Enko tca anihwe ki witamatinawaw tan kaie nin e ici wapatam. Kirika tca kwecan kirawe kata micta miropariniw ka ocki pimatisitcik e nta pamiparitcik. Ekote meka tca, nama kirawe kinowec ki ka otamahitinawaw e otamiroiekw. Kaskina ki matcacikatinawaw acitc ki pakoserimitinawaw kitci miropariekw wa ici otamiroekw.
	Pasiko Waban e matcatc.

Tan e ici wapatamekw aniheriw ka itatisitc Waban ? Arica ia ni kit iteriten totam tepirak kitci kiwe wicamakaniwitc kekotc tapwe ?
Tapwew niheriw ka totak : Ki matcataw aniheriw ka wi nta pamiparitc misawatc aka aci e taciketc wi totam kekociciriw kitci miroparinik. Aka kirakec kitci iteritak tekaci nama kekocic miroparin ka wi totaman.	Tepirak ni kitci kiwe wicamakaniwitc kitci nta witcihiwetc.	Tapwe ni niheriw ka wi totak : Arimatc ni iteritamopan kekociciriw kitci witamowatc okwimesa kitci cowatc iterimotc kitci kackitatc kitci oniketc.

Prof -

Aka patama Waban. Ni wi witen kekocic. Ki tapwan ka witaman anihwe kitci mamitoneritcikatek otirosowin. Anihwe ka ici mikawasititaman tapwe enko ni ka kicteritakok kitci kiskeritcikatek tan e ici pimatcihitisonaniwok tante wa icaniwok : ekota ni wetci micta pa mireritak awik nama ni awocamec nakackako. Tapwe tca anihwe ka itein nama tapi tapwe ki otci otamirotakaniwon anihwe itekera. Aric, takon ni kekocic ka mamiskateritamahin ni e itatisiin. Ki pe nta nakickowinan kitci pe nta mikwasmiak anihwe otirosowin. Ki witamowinan aka e ki otci actaiak anihe neta kitci weritaiak. Kirika tca ki pe icinan enko anihe kirika ka ki totakoian wetci ki matcain. Aci tca e nisitotamak aci kirawe e wapatamak ka wi totamopan. Kirakec sa nit iteriten mia sa…

Claudie -	Ehe.
Rodrigue -	Ehe.
Prof -	…aci tca e nisitotamak ka ici wapatamn kir, ekoni minawatc e ici matcain e pe iciak matcacikw kaskina.
Valentine -	Tapwe sa ni, nama kaie tapwe ni wi nisitoten. Nama ni tacikatai ka kitciparinaniwok e otamirotakaniwok aric e ici wapataman. Takon kiapatc kekocica ke ki aitotcikatek awocamec kitci saperitakok e nta pamiparinaniwok. Ki pe wawitamowinan eko tca e ici matcain minawatc mia sa e pe iciak matca tca kirawa otamirotakw anihe kaskina.
Waban -	Nama ni ki otci pe ican ota kitci micta orictaian kekocic. Tepirak kotc ki pe nta witamatitaw kekwan wetci ki matcaian acitc tan nin e ici wapatamapan…
Claudie -	Waban, werita ni kiskeriten nin, Ki teperimon ia ni kiapatc kitci pe nta witcihiak?
Waban -	Ke ki ititakok aci ni ki ickwa onikaten anihe.
Rodrigue -	Nama kit ititinan kitci pe kiwe posiin neta e otamirotaiak aric kitci pe icain kaie kir e matceparinaniwok. Kit iteriten ia ni anotc ka itaitain kata miroparin kitci pe icain?
Waban -	E itaitaian? Euh… ehe.
Prof -	Peikw kekocic ki ta witamatinawaw ke totamekw.Minawatc mawotcihitoekwe ki ta ki wicamawaw Waban kitci aiarimotak aniheriw kaskina. Kitci aiatisokatak ite ke pa aicaiekw tapwe meka micta mitceno kekocic ka kitciweritakok ke ki kiskeritcikatekipan.
Éric -	Mitowi ia ko nte kekocic e kitci tipatcimoctakaniwok.
Prof -	E kitci tipatcimoctakaniwok, kekatc osaminikatew. Matci aric kitci wapatamotariwetc kekociciriw tepirak. Kecpin iteritamone kitci totaman matci ki ta witcihitin e weritain.
Claudie -	Micta mirwacin ka ici mamitoneritamekw!
Les autres -	Ehe tapwe!
Claudie -	Tan tca Waban?
Waban -	Ketci potc ni ka koski otamiron neta! Nama ntowatc ni ka onikaten.
Rodrigue -	Nama kaie ni wi osami aitwan, aric ki witamatin minawatc aric ke icinakok kata tawok ke pa aicatcik mikwamiskak rikwatowa acitc karoca kitci pa atawetcik ke tawihikaniwok. Ekoni ki ta toten kitci pa witcihitcik e pa kiwe witci otamiromiak.
Valentine -	Patama aric aka kitci nantoniketcik mitowi Éric ka ki totak, e nicitcik arimatc nicw kata nanakatcihakaniwok, kata arimikew orina ickwecic niheriw e totak.
Claudie -	Micta kitimakisiw Valentine! Ki micta kitimihikok ka witci otamiromatcik.

E ici kackitatc Marilou

Inter -Kwei Marilou.

Marilou -Kwei!

Int -Ni wi kokwetcikemon kekocic.

Marilou -Kekwan?

Int -	Kir sa, Kekwan ni ka micta mirwatikosiwakein kekotc ka micta kackitain.
Marilou -	Ka mirwatikosiwakeian? E pa witacikemakik awiik.
Int -	Ki micta kicteritcikan.
Marilou -	Ehe. Tapwe.
Int -	Minawatc tca?
Marilou -	Ni micta otamirowatisin. Nama ni kocten kitci otamiroan.
Int -	Ekote. Minawatc tca?
Marilou -	Ni sakitan e atoskectakeian. Nanake ni wi ni minawatc weritan kekocic kitci totahikik ka ocki pimatisitcik acitc ka kiceatisitcik… kaskina awik.
Marilou -	Anihe ia ko otamirowin kaskina ko awik ka otamiroctowakaniwitc.
Int -	Ehe. Enko ni mia.
Marilou -	Ni sakitan ni e micta aiatcian. Kirika ni sakitan ocki kekocic e ocki kiskeritaman.
Int -	Icinikatew ni anihe ka micta ko wi awocamec nanto kiskeritak awik e apitc kitaweritak.
Marilou -	Ehe.
Int -	Kecpin tca kaskina ickwecak ka micta ko atawamitisotcik itatisitcik mitowi kir kata micta mireritakonopan.
Marilou -	Ki papirotowinawaw ia ni?
Int -	Nama kirake. Ma ni ki wapaten Marilou, arimatc ni wapatam awik e ici kackitatc acitc aka ka ici kackitatc kitci minawatc kiskeritak kekwariw ke otamirotatc. Ekota wetci takonik minawatc kitci mackawerimotc. Kecpin e atawapamitisotc nama awocamec kata ki miro otamiro.
Marilou -	Kirawe aric mitceno aka ka kackitaian patok ka ici kackitaian.
Int -	Tan tca takon ia ko kaie kir kirawe e mamitoneritaman aka ka kackitaiin patok anihe kitci mamitoneritaman ka kackitaiin?
Marilou -	Nama aspinikotc ni mamitoneriten.Ka kitciparian nirctam neta ka otamiroan tekaci nama ni ki otci mamitoneriten.Aric neta apitc ka itwaniwok aiackotc kata masinaham awik e aitwaniwonik. Aci nta ni ki mamitoneriten.
Int -	Anotc tca kekwan wetci micta mamitoneritaman?
Marilou -	Osam aka e takok aci ka arimihikoian. Kiapatc ni otapinen matci mackiki. Nama ni miroparin e kiskinohamakoian. Ka wi nta pamiparinaniwok tekaci nama anihe aci nin ni mamitoneriten. Notawi aka e ponihitc kaskina wiec e aitemitc tepirak aka aci e wi otapinamok matci mackikiriw acitc e pe icitc nama ki ka kackitan kitci ponitaiin. Minawatc kiapatc nicim e ki matcatc.
Int -	Matci ia kaskina papeikw ki ka ki kanawapatenano anihi kaskina ka arimipariin? Patama aci ki ki kackitan kitci pontaiin. Wirata nanikotin kiapatc ki otapinen. Ekote ia ni?
Marilou -	Ehe.
Int -	Minawatc anaha kicim, matci kekocic ki ka totenano wir otci nte ka ici kanaweritakositc. Matci kitci natawapamatc nanikotin peikwa e markananiwok kitci tca matci nta pamoteratc.
Marilou -	Ni ta micta mireriten.
Int -	Minawatc tca wir anaha kotawi e taci aitemiskw e wi ponitawotc. Mocak ia ni ekoni e aitotak?
Marilou -	Nama, aric ni cikeriten aric peikon niheriw e pe totask e pe papirotowitc patok kitci pe witcihitc. Kecpin wir aniheriw e totak ceckwatc wiec ni pe itikw wir meka aniheriw. Matca wir kiapatc kata aitotam aric kitci ponihitc. Nama ni nin aci.
Int -	Nama ki ka ki meckotatisihaw kotawi misawatc wir aka e wi witcihisk nama ki ka poneriten kir kekwan ka wi totaman kir otci.
Marilou -	Tapwe tca ni.
Int -	Aka aci otapinamone matci mackiki ki ka micta witcihikon mictahi e ici mamitoneritaman acitc e kiskinohamasoiin.
Marilou -	Enko meka anihe ka nateweritaman.
Int -	Ki ka ki tca minawatc mamitoneriten kaie kir kitci nta pamipariin.
Marilou -	Ni ta micta mireriten aric nama ketcinatc aci nin otci kata miroparin.
Int -	Kiapatc minawatc ki ka aiarimotenano. Tawok ia kikwimesak aka ka otapinakik matci mackikiriw?
Marilou -	Ehe, Nama aric tapwe ni pa witacikemawok aniki.
Int -	Enko aniki kirawe ki ta okwimesin.
Marilou -	Ni ka kotcitan matci.

Ici arimwewok nete France ka mitatcik

Ki ici arimwew nete France anohwe kiskinohamake iriniw ka kiskerimatc ka ki ici aimihatc kitci witak nte kitci pe takociniritci ka ocki pimatisiritci kitci nta pehakaniwiritci. Ki motci takapikemowakaniwok acitc pamikicikopitcikanik ici wawitamowakaniwok aniki ke pehotcik nete.