14. Witcicanak | Libertox

Orina micta arimipariw Marilou acitc owitcicana. Minawatc wir Waban nakickowew ka witcihiweritci acitc onikihikwa. Peikon kaie wir Marilou okawia enko anihi peikon ka nakickowatc ka witcihiweritci. Waban aimihew Claudiwa e arimomatc Marilouwa. Minawatc anaha kiskinohamake iriniw witcihihiwew e weritakaniwonik ke aititoskaniwonik.

Kit iteriten ia kata matcapan omikiwamik Marilou?

Int -

Kit iteriten ia kiapatc ki ta mawotcihitonano mamo kiwitcinak?

Marilou -

Nama kata mireritamok. Esko kiskeritak notawi e wi ponitawak kaskina wiec nit aicinikatikw e papirotowitc. Awoctakocik wekockatc ni ki itikw kitci totowimamiki napaneca.

Int -	Tan e itein!
Marilou -	Nama nin ni wi totowatai, aric ni ki micta wisikipitonepitikw. E tca pe icitc e marerimakitc nin kirika nictes. Kirika tca e itetc aka kitci pakitinitc kecpin aka nosanetawoke ka ici irakoniketc.
Int -	Keko irakonikewin?
Marilou -	Niheriw ka wi itetc kitci otapinamomaki napaneca.

Int -	Natota, Marilou. Micta kice pataham. E kanawapatcikatek kitci mirwatcitain. Arimatc ketcinatc ki ka matcan memacic neta kimikiwamik.
Marilou -	Aci ni ki ickwa ican anihwe towi nin kitci kanaweritakosian wiec pitoc nama tca nte aci ni wi ican.
Int -	Nama tepirak aniki tawok aniki ka kanawerimiwetcik. Takon kaie kotak kekocic ka ocki pimatisitcik ka ici kanaweritakositcik mitowi kir ka ici pimotetcik. Ki ka nanto kiskeritenano ia?
Marilou -	Ni micta aci tactakaten. Ni wi onikan ni nin anihe kaskina.
Int -	Ni ka nanto kiskeriten ki ka tca iti witamatin minawatc nanake. Kit ici naheriten ia?
Marilou -	OK. Ekwa tca ni ke ki iteritaman nama aci nin ni ka ki ican e nta pamiparinaniwok.
Int -	Epwamoci anihe ici mamitoneritaman patama ki ki petanano ke iti aisparik.

Nanake minawatc taka tato kickwa.

Int -	Ni ki meka tca nanto kiskeriten. Takon ni ke ki icaipan ka ocki pimatisitcik ka ici tacikahakaniwitcik ke ki icaipan. Matci neta ki ta tacikan acitc ki ta kiskinohamason neta.
Marilou -	Nama potc arimatc. Kata ni matcaw notawi kitci nta otamirotc mitceto pisimwa. Tepirak ni ko nanikotin kata pe takocin.
Int -	Ah! Ka ocki kekocic meka tca anihe ka iciwepak.
Marilou -	Matci tca potc ni ka ki ican kaie nin e nta pamiparinaniwok.
Int -	Ehe. Kiwapaten iti ni nahiparin. Aric kaketin mackawerita aka aci kitci otapinaman matci mackiki.

Waban mamo onikihikwa e nta nakickowatcik ka witcihiweritci.

Ka witcihiwetc,Waban acitc otawi kirika okawi.
Aniheriw ke arimotakik Waban ka arimihikotc matci mackikiriw. Ka ki aric iti kackitatc kitci ponitatc kirika tca kekwariw wetci otapinak matci mackikiriw. Kaskina wawitamok tan ka ki aiterimotcik. Wawitcikatew kekwan ka arimihikonaniwok kitci aimihitonaniwok.

Int -	Ni ki pe wawitamok kaskina ka ici arimihikotc wewerita kitci aimihikoiekw peikon kaie kaie kirawaw e arimisiekw kitci aimihekw. Kirawaw tca onikihikok peikon ia ni e ici wapatamekw?
Mère -	Nin, Mocak ni ki kotcitan kitci natotowikik ninitcanicak acitc kitci mihakik kekwariw ka kackitain kitci ici mirakik.
Int -	Tan ni e ici wapataman, Ni natotowawok?
Mère -	E natotowikik kekwariw ka pe witamowitcik acitc e kanawapamakik tan e ici kiskerimakik kekwariw e totakik. Mocak e motci aimihitoiak.
Int -	Matci ia peikw ki ta pe witen mitowi?
Mère -	Anihe mitowi, E taci pwapwapikepitciketc mekwata minawatc micta keska e takapikenamowatc okwimesa. Nama meka ko minawatc otapinam opwapwapikepitcikan e ickwa arimowetc. Nin tca ni nta nahikamoan opwapwapikepitcikan e pitahamok opitahotcikanik aka kitci pikotinik.Ke makotc kekociciriw e wi mitcitc ni ocitawan aniheriw ka ici wikactak. Micta keskatc meka ko pitoc wi ici mitciso. Mitowi ko kaie e mari kicikak, kecpin e nahactasoan ki kokwetcimaw kitci pe witcihitc mocak tca ko ici naheritam. Kecpin tca ko e wapamak aka e saperitak ntowatc ko nit itaw : ekoni ici ica ite wa icain nin tca ni ka kictan.
Int -	Kecpin tca aka nahikamowatc opwapwapikepitcikan kekotc ma cikimatc kitci kictatc e witcihiskw e nahactasoiekw tan ke isparikipan?
Mère -	Oh! Nit iteriten kata takonopan minawatc nikotin kitci iti aitotiskeian anihe.
Int -	Ni wi kiskeriten tan apitc anihe nikotin?
Mère -	Aka tacikete nimikiwaminak.
Père -	Nin, Mocak nit itimawa okawia : ekoni ma aci ka aitotowatc mia kiapatc e micta apicicitc. Nin e ici wapataman, nikotin tecikotc ni kitciparin anihe e totcikatek. Kecpin aka tecikotc e ititoskein kekocic nama ni minawatc ki iti aitotiskan.
Int -	Kir tca, Waban, tan e ici wapataman?
Waban -	Nit iteriten… Matci ni ta kictan kekocic e itotiskeian ni aric e ici oreritaman.
Int -	Kir tca, Waban okawia, tan e ici waptaman?
Mère -	Osam potc ni wi micta mirotowaw, aric… Anaha Waban, mocak aitotiskew kekociciriw ka acterik kitci aitotisketc tepirak tca nama ni tapwe kito. Ekote tca potc memantcic e ici witamowak mocak kitci tacikewak wir otci.
Père -	Tapwe ni anihe namiew ni naha ka micta arimwetc ko.Wirat ni nisitotowaw ni tato piponesinaniwok nama tapwe kitonaniwon acitc nama arimatc kaskina ki wawiten kekocic. Nama ni pehanan kitci pe micta aimihimitc. Mia potc ketcinatc aka e kiskerimikoiak ekoni e totowimitc. Kirika tca e ici kiskerimakitc. Tapwe takoniw nanikotin ka wi witamoiak aric mia sa ko e otamihakitc. Aimihew Waban : Mia nta ka arimihikoin matci mackiki, ni ta ki mireriten ni nin kitci aimihitan, tepirak kitci aimihitan, nama kitci kitotitan. Aric ko tepirak kekocic e witamatak tecikotc ko kit iteriten ni kitotikoin. Mitowi ko e ocimotitowiak. Ekote aric mocak ka ki totowiak. Nama potc ki tapi kiskeritenan kir ka ici kiskeritaman. Nama aric ki ka ki iteriminan nama kekocic ni nisitotenan.
	Nama kitonaniwon.
Int -	Kir tca, Waban, kecpin tca ko e wi aimihatc kotawi, kekwan ka nakickakoin?
Waban -	Nanikotin, ni kocten ko kitci cikeritamihak kekotc aka kitci kackitain kitci nisitotakoian kekocic e witaman. Kirawe tca ko ni mireriten aka kekocic kitci witaman nicike tca kekocic kitci iti nahiparik.
Int -	Waban, Ma tca ni kirawe ko ki tototen aka kitci witaman kekocic tepirak aka kitci kiskerimikoin ite kaie kir e ici apineckain e karitisoin? Kecpin tca ko neta e tacikein mekwata neta e taci aiterimoin kotc kekocic e itikoin tecikotc kit iteriten ni kitotikoin?
Waban -	Matci potc… Nama aric mocak.
Mère -	Ki kiskerimitinan ni Waban, ekote e ici sakihitak. Nama ni kaie ninan mia nit itatisinan. Kecpin aric aka wiskatc witamake nama kekocic kata meckotciparin. Kir tca, ki ka ni kackitan kitci sakihiak kotc e itatisiak?
Int -	Ki kiskeriten ia Waban nama ni kotc ici miroparin kekocic e ici nataweritcikatek, peikon kaie wir tipawe awik e kanawapamitisotc. Kitci ki aric awik kackihotc kekociciriw e nakickak, patama nisitotatiso acitc tapwerimitiso kotc e ici mackawisitc ekota meka neta wetci miskak omackawisiin. Ekota kaie ke otci witcihitisotc kitci sokikapowitc. E miskak awik tapwerimitisowiniw misawatc aka mia e aitotak kekociciriw. Ekote kaie aka ke otci koctak kekociciriw.
Père -	Nin, kekocic ka aiteian e aiarimweian ekote ko wetci nisitotatonaniwok. Tapwe nama mocak nahitatonaniwon aric ma kiskeritakon tan e iterimonaniwok tan awik e iterimotc acitc tan e iteritak.
Waban -	Nanikotin, tepirak ko nit iteriten nama arimatc ni ka witen. Nama aric ni e wi kasoan.
Int -	Eko tca kecpin aka e wi arimwetc anaha okosinan, aniki tca wirawaw onikihikonanak, wirawaw e wi arimwetcik, e wi aimihatcik okosiwaw, tan tca ke ki totcikatek kitci ki kaskina awik mireritak? Ma ia tca kit iteriten acteriw kaie wirawaw kitci aimihatcik onikihikonanak okosiwaw anihe towi e nakickatek?
Mère -	Ehe, nama aric tapwe wetan.
Père -	Nama awik cikimakaniwiw kitci arimwetc.
Int -	Neta mekwata e iciwepasinaniwok, tepirak kotc e arimwaniwok nipara ni witcikatew e iterimonaniwok, nama arimatc awik naskamo tepirak witam tan e iterimotc. Kirika tca nama awik cikimakaniwiw kitci witak kekociciriw, tepirak kotc pehakaniwiw wir tan e iterimotc irikik kotc e kackitatc kitci witak. Kecpin e arimwetc Waban aka micta petakw tecikotc kitci naskamotc, nanikotin kirawe miroparin e pehonaniwok kitci takok kekocic ke witcihiwemakak.

Tan ni ke ki totak Waban aka kitci cakwerimotc kitci aimihiwetc mia kitci witak wa itetc ?

Aka kitci cakwerimotc wa itetc aka kitci pameritak kekociciriw e itakaniwitc. Aka kaie kitci pameritciketc.

Kecpin aka tecikotc e kackitatc kitci witak ka wi itetc. Peikon kitci aiarimwetc patak tekaci aka kitci kitotc.Ekote wetci orowiparik kekocic e wi arimotcikatek peikon e aiarimwaniwok.

Kitci ponitatc e taci micta nanakaskohitisotc e koctak wiec kitci itakaniwitc. Kecpin e kiskerimakaniwitc ni e taci aitotak ekoni atcikotc aka tapwe e aimihakaniwitc.

Waban e takapikenamowatc Claudiwa

Waban -	Kwei Claudie, Waban nin.
Claudie -	Kwei Waban.
Waban -	Ni micta mireriten minawatc kitci nta witci pamiparimitakok. Aci nama nte ni ici mamitoneritetai aric ni ta ki mamiskateritetai kaskina kirawaw kitci matcaiekw nircike tca ota kitci pa aitacikeian.
Claudie -	Kaie nin, ni ta ki micta mamiskateritetai.
Waban -	Aric kekocic nit arimeritamihikon. Nit iteriten ni kaie wir ni Marilou ki ta kiwe wicamano. Matci nin minawatc ni pe koski posin kaie wir tca matci kata pe koski icapan. Atcikotc nit iteriten, ki taci pakiterimano. Nit iterimaw ni nama ni aci kaie wir kekociciriw otapinam. Ni ka kotci natawapamaw kitci nanto kiskerimak. Ki mikawin misawatc e micta arimiparispan micta ni ko peikon mantokasopan kekociciriw e totak. Micta ni tapwetamopan. Tan e iteritaman kir?
Claudie -	Tapwe kaie nin nta micta mireriten kitci pe koski pe icatc Marilou. Aric… Ma tca kit iteriten kirawe ka tiperitak awaciwikiwamik kata aimihepan? Matci ki ta ki witamowaw Marilou kitci natawapamatc ka tiperitamiritci. Kata tca nanto kiskeritamopan awocamec kirawe tca ki ta kiskeritenano ke ki totamokw. Kecpin meka ni ici wicamokwe minawatc kiapatc otapinamokwen matci mackikiriw aritcikoc minawatc ki ka aitikowinano. Matci kaie atcikotc kata iti matciparin ohwe mekwata ka taci aikamokw ka wi matcaiikw kitci nta pamipariikw.
Waban -	OK, ekote ke totaman.
Claudie -	Pe witamacikan minawatc.

Waban kirika kiskinohamake iriniwa

Prof -	Ah! Waban. Kwei.
Waban -	Kwei. Wow! Micta mitceno ka petain kekocic e tipatcimomakak!
Prof -	Ni ki petan mitcet masinahikana e tipatcimomakaki e arimotcikateki nte mia ka wi icaiekw. Takono kaie masinahikana e arimotcikateki nte aci ka ki ickwa pa aicaian.
Waban -	Aci mia apita e ki ickwa ocitaiikw otamirowin enko meka ka micta arimak kinec aitacikatew e nantonikateki.
Prof -	Tapwe tca ni, micta nipara anihe aka arimatc kitci micta pa weritain. Tan e ici wapataman ke ici wapatariwein?
Waban -	Ni ki iteritetai micta karo kitci wapatariweian e masinateki kaskina ite ka wi icaniwok. Kirika tca masinasowinak e arimotcikateki anihe ke wapatariweian.
Prof -	Ekote! micta mirwacin anihe ke totaman. Matci meka tca ki ta ki toten ki ta kaskina wawapamawok kitci oramatcik aiapitc aniki nirctam ke wapatariwein. Aka tca micta osami mitcet orami matci potc wiec nicw kekotc nicto e masinatek. Kecpin meka micta osam mitcetiwatai nama atcikotc kata wi saperitamok ke aitein. Namiew meka anihe ko e kiskinohamakaniwok atisokan. Tepirak kitci kiskeritakik e icinakonik kwecan tca kata wi nta kanawapatamok ke ma kotc awocamec kitci nanto kiskeritakik. Aipitc tca nin ni ka ponitan mekwata ka taci aitotaman. Kecpin tca takonokwen kekocic ka wi kokwetcikemoin ekoci ki ka pe kokwetcimin. Ohwe tca masinahikanica ka akockatiki matci ke actain kitci kicawatcitain ka orapitaman.
Waban -	Mikwetc. Ni ka micta mireriten e otamiroan.

E ickwa peiko tipahikanearik.

Prof -	Tan tca! Waban, ki ia tca micta miskason?
Waban -	Micta mirwacin. Micta kice mirwacino ka ki miskaman. Takonopan atita aci e kiskeritaman aric awocamec kirawe aci ni ki nanto kiskeriten. Kirawe tca aci anotc ni miro kiskeriten ka ki ici miskaman.
Prof -	Ni ka meka tca kokwetcimaw wapake ka otamirotc ko neta ka atoskectaketc ki ocitatc ki mitcenik, kitci tapasinahikeparitatc. Matci tca kaie kikinokepitcikanik ki ka ki actan minawatc tca kitci ici itapiketitaiin kaskina tca awik kitci wapatak nte ko opimetak ka ici masinacteparitakaniwok.
Waban -	Ni micta nakasin kaskina awik kitci wapatak.
Prof -	Ki micta saperiten kir nakamowin, taina?
Waban -	Ehe.
Prof -	Kecpin tca wi totamone kirika ke ici wapatariwein kitci acotcitain kitci petakok kirika nakamowin. Matci ko anihe weckatc ka ici natotcikatekipan mia sa ko kirawe e posiparinaniwok e petakotakaniwok nakamowin. Tawok ni ni aniki tekarepicicak towihik weckatc ko nte e itemakokipan nakamowin matci ki ka awihitin kitci natotowitcik kir tca nte oramakanak.
Waban -	Ehe tan! Kata micta kirawe mirwacin anihe ke ici wapatariweian. Micta nipara kir ka ici kiskeritaman kirawe tca wipatc ki pe natawapamitan!
Prof -	Ah! Ah! Matci potc. Aric kirawe ka kictapatak anihe minawatc ke iti aisparik enko kirawe ka kictapatak. Ekoni patama, aci arimatc ni ka otamiron matci tca patama ekoni ici matca.
Waban -	Micta mikwetc.

Marilou kirika okawia e natawapamatcik ka witcihiweritci

Int -	Kwei Marilou. Kwei iskwew.
Marilou, okawia- Kwei.Marilou, -	Kwei.
Int -	Mikwetc e ki pe icain. Micta nataweritamopan ni Marilou kitci nakickotatoiikw e nictiikw. Esko ki pe nta nakickowitc, mocak ki pe arimomew owitcicana.
Mère -	Ki micta mirwatisoketake.
Int -	Misawatc aka e mirwatisoketc kekotc e micta mirwatisoketc, nin, e itotiskeian nama actew kitci tipaskonanik ni itactek ke itotiskeian kitci ni witcihakik kitci kackitatcik kitci kiskeritakik ke ici matcatcik acitc kitci kackitatcik kitci witakik tan e iterimotcik.
Mère -	Kekwan ka ici peihiekw?
Int -	Wetci ni nakickotatoikw anotc kitci ni witcihiaikw Marilou kitci kackitatc e witak tan e iterimotc. Kirawe nte itekera tan e iciwepasitc owitcicanik itekera. Kirika tca kirawe kitci witamatoiikw tan kirica okawia tan e iterimoiin neta tan e itatisitc anotc mekwata Marilou. Ekwa ni ka wi nanto kiskeritamopan?
Mère -	mmm… ehe.
Int -	Marilou ki pe atisokowitai tan e iterimoin e wapamatcik kinikihikok e otapinakik matci mackikiriw, kirawe nte aka nte e takok e kiskinohamakaniwok. Kekwariw ka wi witamowatc kikawi aniheriw otci?
Marilou -	Ni wi witamowaw… e micta tactakataman anihe kaskina e wapataman acitc tca e wapamak nicim kaie wir aniheriw e ici pimatisiwihakaniwitc.
Int -	Kekwariw tca ka natawerimowitcik kinikihikok ke totakik?
Marilou -	Kecpin ni wa totamowate notawi acitc nikawi e otapinakik matci mackikiriw matca nete pitoc wiec warawik kata nta totamok.
Int -	Tan e ici wapataman kir, Waban okawia?
Mère -	(Nama wiec kackitaw kitci totak acitc wiec kitci itetc.)
Marilou -	Kirika tca ni apitc wekockatc ka pe icitc notawi kitci otapinamaki napaneca, kirawe kiapatc nta ni ki onipatikon.
Int à la mère -	Ki kiskeritetai ia ni?
Mère -	Matci potc ni ki pe arimotamakotakai?
Marilou -	Ehe, ki ni witamatiatai.
Mère -	Ki kiskeritenatake, anahwe ninapem matci iriniwiw ni, nama ni ki totenan anihwe ka wi totamak kecpin e taciketc. Ekote kaie e isparitc esko aniheriw aitotak mia sa e ki kiwockwatisihikotc esko aniheriw aitotak. Nama aci ni kiskeriten ke totaman.
Int -	Kecpin tca kir matci ki oreritaman ke ki totaman aka wiec kitci iciwepasitcik kinitcanicak, tan ki ta toten aniheriw ka witak Marilou?
Mère -	Ni ta mireriten kitci mirwatcitatcik awacak aka kitci takickakotcik ka ici arimiparitci iriniwa.
Marilou -	Kir tca kiapatc ia ni ekoni ke totaman mekwata ka taci aitotaman. Ekote ia ni?
Mère -	Ni kiskeriten ni tapwe acteriw ka wi totakik acteriw kitci totakik iriniwok aric ma ni kiskeriten anotc mekwata ka taci aitotamak nama mirwacin awacak otci.
Int -	Ki itwan ia matci ni otapinamok iriniwok matci kekociciriw nama ketcinatc wiec kata ispariwok awacak?
Marilou -	Ni ki kotcitan patama memantcic kitci ponitaian nac tekaci ni ki iti ponitan. Nama aric ni ki otci kotcitan. Ekote aric ni e icinakok. Ekoni kotc ke ici otapinitisoian tan kotc e icinakosian. Wirata ni wi witcihawok awacak nama aric ni teperimon.
Int -	Tante ki ta ici mireriten kitci ici witcihikoin?
Mère -	Kitci tatc ke otacerimian, kitci aimihak e wi arimweian acitc kitci pe witcihitc kitci onockweritaman ka arimeritamihikoian. Kitci witcihitc aka kitci mikaweritaman matci mackiki.
Int -	Tapwe kotc tan e aiciwepasiin anotc mekwata kipimatisiwinik? Matci kaie peikon peikorkanan e ici kanawapataman.
Mère -	Ah! Erowek ni, E kicepawok matcawok wirawaw ickwecak e nta kiskinohamasotcik, nin tca askwi notamiron atawekamikocik, kirika ni tcipakwanan, ni kisisipatcikanan. Nanikotin Marilou ni pe witcihikw e tcipakwewok.
Marilou -	Aric anihwe e tcipakwaniwok mocak awik wircike aitacikatiso. Tan kotc ke ici miskasotc maskomiwocik ekweriw ke mitcik mekwata meka ko kaie arowepinaniwon nama takon e kiskinohamakaniwok.
Mère -	Ni kiskerimitison ni wirata…aka e totaman kaskina ke aitotoskeian ninitcanicak otci tan e ici nataweritakik kitci itotiskeiikw wirawaw otci. Ni ka aric kotcitan kitci otamirohitisoian kaie nin kaketin. Nama ni mocak nte ki otci isparin nama ketcinatc mikawitake Marilou.Micta meka ni awaciwipan.
Int -	Kecpin e arimomak aceriw ke nanakatcihitc nama ni tapwe nin neta ni posiparin. (papiw) Kekwan ki ta mireriten kitci ici witcihikoin? Mitowi, kitci tatc awik ke ki witcihisk peikwa peikorkanan tepirak kitci aiarimoweikw tapickotc. Matci kaie ki ta witcihikw kitci orocawataman tan tca kir ke ici miworitisoin minawa nte ke iti markananiwok. Ma kit iteriten kata mirwacinopan?
Mère -	Matci potc.
Int -	Kir tca, Marilou, kit iteriten ia ki ta witcihikon?
Marilou -	Ketcinatc…Kirake ma kata tapan awik ke aimihakaniwitc. Kecpin pe icate matci e mari kicikarik, nama wiec kata totcikatepan ko ka nta totcikatek e mari kicikak.
Int -	Kecpin ici naheritamane matci ni nta natowi toten kitci miroparik kitci tatc awik ke nakictakw kecpin ici naheritamekwe.
Mère -	Nama wiec nit iteriten.
Int -	Kir tca, Marilou, takopan ia kekocic ka wi itein epwamoci kictaiikw.
Marilou -	Nin, ni ta mireriten kitci nokok tapwe tca e witcicanitoiikw. Tapwe wirata nama tecikotc kata iti nokon anihwe minawatc aric ma kecpin tarite awiriwa ke aimihatc nikawi kitci nisitotakotc nipara kata witcihiko. Kirika tca nta mireriten kitci nicim kitci pe kiwetc ni ki wapamaw awoctakocik e taci wi kokwe aimihikotc Victor.
Int -	Awin tca anaha Victor?
Marilou -	Ka atawetc matci mackikiriw.

Kata ni minawatc miropariniw Marilou tapickotc owitcicana tapickotc kitci taciketcik kitci tca miroparihitotcik ?
Ehe	Nama	Nama kiskeritakon .
E micta tapwetak kata iti kackitaw Marilou kitci nahiparihitotcik nac minawatc kitci iti witacikemitotcik.	Kata miropariniw kitci witacikematc ocima acitc okawia nama aric kata ki micta micataw ka ici nataweritak tapickotc kaskina ki taciketcik mamo owitcicana.	Nama ki ta ki itwaniwon nama kata miropariniw. Aric ma nama wir kata ki meckotcitaw aric ma matci ki ta ki iti nokotaw kitci meckotciparinik.